16ê êlule de dima ke cinîya kurde Jîna Emînî hetê polîsanê exlaqî yê Îranî ra amebî qetilkerdene Îran û Rojhelatê Kurdîstanî de çalakîyê şarî dewam kenê. Çalakîyan 110 rojî xo pey de verdayî.
Bi taybetî Rojhelatê Kurdîstanî de protestoyî bi hawayêkê hîrayî yenê kerdene. Şaristanê Mahabadî de bi wesîleya roja 40. ya şînê Şemale Xedîrî Pûr vizêr merasîmêk ame kerdene. Merasîm de bi sloganan paştî dîyaye şarê Ciwanroyî yo ke binê ablûqa de yo. Ciwanro de zî hêzê neweyî kuçeyan de ameyî cakerdene. Şaristanê Mîyandwa de zî Mêhran Şikarîyo ke teşrîna peyêne de amebi qetilkerdene, serê gorê xo de ame yadkerdene.
Ewro zî şaristan de çalakîyî dewam kenê. Goreyê aktîvîstanê heqanê merdiman ê HRANA 16ê êlule ra nata 70ê ci serra 18î ra qijêr 516 kesî ameyê qetilkerdene û 19 hezar û 204 kesî zî ameyî destbendkerdene. Goreyê HRANA çalakîyî 161 şaristanan rê vila bîyê.
Rêxistina Heqanê Merdiman a Îranî (IHR) zî pare kerd ke 16ê êlule ra heta 27ê kanûne 64ê ci domanî, 34ê ci cinîyî 476 çalakîkerî ameyê qetilkerdene û 100 çalakîkeranê tepişteyan ser o zî gefê dardekerdişî est ê.
