Nobeta Edaletî ya wekîlanê Partîya Demokratîke ya Şaran (HDP) vera tecrîdê Îmraliyî roja 10. de ya. Wekîlî Fatma Kurtulan, Murat Sarisaç, Abdullah Koç, Habîp Eksîk, Erdal Aydemîr, Huseyîn Kaçmaz, Hasan Ozguneş, Erol Katircioglû, Mahmut Togrul, Celadet Gaydali, Ayşe Surucu, Nusrettîn Maçîn û Îmam Taşiçer ver Berê Dîkmenî yê Wezîrîya Edaletî şîyî û hetê polîsan ra ameyî astengkerdene.
Habîb Eksîkî nameyê wekîlan ser o eşkerayîye wende. Eksîkî ard ziwan ke tecrîd verê ameyoxê şaran de astengîyêka tewr pîl a. Eksîkî vat: “No tecrîdê vera Birêz Ocalanî vera peyman û qanûnanê mîyanneteweyîyan o. Heqê Ocalanî yenê xespkerdene; destûr nêdîyeno ke o avûkatanê xo bivîno. Ganî Abdullah Ocalan azad bibo. Heta ke tecrîd dewam bikero şer û krîzo ekonomîk zî do dewam bikerê. Aktorê çareserîye yo tewr girîng Birêz Ocalan o.”
Ganî muxatabanê mesele reyde pêvînayîş bêro kerdene
Eksîkî dewamê eşkerayîye de venf da Wezîrîya Edaletî ke peynîya tecrîdî bîyara û vat: “Sîstemê tecrîdî ganî biqedo. No sîstemê tecrîdî yê Îmraliyî metodêkê îşkenceyî yo. Ganî heqê Birêz Ocalanî bêrê dayene. Ma reyna venga Wezîrîya Edaletî danê ke peynîya tecrîdî bîyara, wa Ocalan bieşko keye û avûkatanê xo bivîno. Seba çareserîya meseleya kurdan ganî muxatabanê mesele de pêvînayîş bêro kerdene.” ANQARA
