Abdurrahman Kizilo ke 23ê kanûne de Paris de pîya bi Evîn Goyî û Mîr Perwerî ame qetilkerdene qezaya Kaxizmanî ya Qersî de ame definkerdene. Hemsereka Pêroyî ya Partîya Herêmê Demokratîkî (DBP) DBPyî Salîha Aydeniz, wekîlê Partîya Demokratîke ya Şaran (HDP) Saît Dede û Remzîye Tosun, merdimê Kizilî û xeylêk kesan cenaza Meydanê Teyarayan ê Harakanî yê Qersî ra girewte û berde Kaxizman.
Seba ke Şaredarîya Qersî ya ke ameya xespkerdene wesayîtê cenaza nêda keyeyê Kizilî, Şaredarîya Panosî ra wesayît ame girewtene. La polîsan evraqê fermî kerdî bahane û destur nêda wesayît cenaza bikirişo. Keyeyî bi kamyonetê ke peyê ci girewtebi cenaza girewte û pîya bi konvoyê bi seyan wesayîtan verê xo da dewa Qereqûnî ya Kaxizmanî.
Leşker û polîsan dewe girewte binê ablûqa û destur nêda qismekê konvoyî bikewo dewe. Rixmê heme astengkerdişan cenaza resaye dewe. Tîya wecîbeyê dînî ameyî caardene û dima ra Kizil goristanê dewe de ame definkerdene. Polîsan destur nêda rojnamegerî goristan de dîmen û fotografan biancê.
Hemsereka Pêroyî ya DBPyî Salîha Aydenîz vist vîrî ke Abdurrahman Kizil bi serran o surgun de yo û vat: “Kurdî ya yenê tepiştene yan zî yenê qetilkerdene û surgunkerdene. Gama ke kurdî yenê qetilkerdene destur nêdanê goreyê wecîbeyanê dînîyan zî bêrê definkerdene. Wa pêro bizanê ke Abdurrahman Kizil şehîdê şarê kurdî yo. Ma do têkoşînê ey bidê domnayene. Rixmê heme zulm û zextan ma do peyser game meerzê. Eke hukmatê Fransa qetilkaranê raştan ê Kizilî mevejo werte do bibo berpirsîyarê nê qirkerdişî.”
Badê qiseykerdişan şar pê slogana “Şehîd Namirin” qîra û verê xo da cayê tehzîye.
