Endamê Komîteya Rayberdişî ya PKKyî Murat Karayilanî xeylêk babetan ser o cewab da persanê ANFyî ser û rojdem ercna.
Beşê yewinî yê roportajê Karayilanî ra tay noqtayê girîngî wina yê:
”Sîstemê tecrîd û îşkenceyî yê Îmraliyî cayêkê bînî yê dinya de û huqûqê globalî de çin o. Îmrali e pêro heqî yenê binpaykerdene. Îqtîdarê AKP-MHPyî yo faşîst şexsê Rayber Apoyî de vera şarê ma nê tecrîdî ano ca. Heta nika avûkatan û keyeyê Rayber Apoyî seba pêvînayîşî zaf reyî muracat kerd, baroyan, dezgehanê mîyanneteweyîyan û wekîlan zî muracat kerd. Rixmê ney zî dewleta tirke tecrîd de israr kena. Îmrali de îşkenceyo komelkî est o. Vera nê tecrîdî zî xoverdayîşê gerîlayan, xoverdayîşê Îmraliyî yê Rayber Apoyî, xoverdayîşê zîndanan est ê û nê mojnenê ke polîtîkaya înkar, îmha û tecrîdî do qetî netîce nêdê. Mefteyê çareserîye ‘Rayber Apoyî rê tecrîd ney azadîye’ yo. Eke Rayber Apo azad bibo demokrasî, cuya azade û têdûşte û çareserîyî do bêrê.
Ez şehîdanê Qirkerdişê Parisî yê 9ê Çeleyê 2013î embaze Sara, Rojbîne û Ronahîye yad kena. Ez venga her kesî dana ke 7ê çeleyî de tewrê rayraşîyayîşê Parisî bibo. Ez şehîdanê Qirkerdişê Parisî yê 23ê Kanûne embaze Evîn Goyî, Mîr Perwer û Abdurrahman Kizil zî bi rêzdarî yad kena. Embaze Evîne embazêka şorişgêre û xoverdayoxe bîye. Ma rê şehadetê aye zaf girîng o.
Tesaduf nîyo ke Qirkerdişê 23ê Kanûne serrgêra Qirkerdişê Roboskî û Qirkerdişê 9ê Çeleyî de ameyo kerdene. Embaze Evîne eşîra keyeyanê Roboskî ra bîye û a sey temsîlkara têkoşînê embaze Sara (Sakîne Cansiz) têgêrayêne. Endama Konseya Rayberdişî ya KCKyî Evîn Goyî nê qirkerdişî de qestî ra ameye hedefkerdene. Qirkerdişê 23ê Kanûne zî sey Qirkerdişê 9ê Çeleyî planê MÎTî bi. Ma do qetî hesabê nê qirkerdişan bipersê. Xora îqtîdarê AKP-MHPyî û dewleta tirke cinîyan ê serkêşan kenê hedef. Seke zanîyeno xoverdayîşê xoîdarekerdişî yê Silopî de zî embazê ma Sêvê Demir, Pakize Nayir, Fatma Uyar ameybî qetilkerdene.
Dewleta Fransa mesuldar a ke kiştoxanê raştan ê nê wird Qirkerdişanê Parisî eşkera bikera. Şarê Kurdistanî zî tira heman çî paweno. Ganî hukmatê Fransa zî bi heman tewirî têbigêro û nê qirkerdişan roşnî bikero. Na babete de dewleta Fransa îmtîhanêk de têrî ya. Ma do bivînê ke Fransa hesabanê gemarinan yan zî huqûqî esas bikera. Eke Fransa bi hawayêkê edîl û raştî nêzdîyê mesele nêba do binê mesuldarîya xo de bimana.” BEHDÎNAN
