Fermandarê Yewinanê Pawitişî yê Rojhelatê Kurdistanî (YRK) Şîyar Şevgerî babetê muhîmî yê 2022î ANFyî rê ercnayî.
Şîyar Şevgerî serra 2022î sey serra qehremanîye û têkoşînî name kerd û vat: 2022 de têkoşînê şarê ma yê vera tecrîdê giranî yê Îmraliyî ame domnayene. Çunke hem şarê ma hem zî şarê Rojhelatê Mîyanênî azadîya xo azadîya Rayber Apoyî de vîneno. Behdînan de rixmê heme teknîkê dişmenî têkoşîno bêhempa ame dayene. Raştî naya ke dewleta tirke ya îşxalkere 2022 de vera têgêrayîşê Apoyîyî bin kewte.
Serrgêra Qirkerdişê 9ê Çeleyî de qirkerdişo bîn ame kerdene. No qirkerdiş semedê hemkarîya dewleta tirke û û Fransa û şiknayîşê têkoşînê azadîye yê kurdan ame kerdene.”
YRKyî serra 2022î de xo her hetî ra aver berdo
Şîyar Şevgerî ard ziwan ke înan sey YRKyî serra 2022î de xo her hetî ra aver berdo û vat: “Ma bi ruhê dewrê neweyî û tewirê gerîlayê modernî, çarçeweya paradîgmaya Rayber Apoyî xo amede kerdo. Ma vera heme hêrişanê îşxalkeran amade yê. Bitaybetî Rojhelat de ma 2023î her qeyde averşîyayîşan rê amede yê. Ma goreyê şertanê adirbirnayîşî têgêrenê. La rejîmê Îranî xeylêk waran de operasyonî kerdî. Şaha, Mukrîyan û Meriwan de bi metodanê cîya cîyayan şîyî embazanê ma ser ke sebrê ma test bikero. La têgêrayîşê ma wayîrê îrade û bawerî yo. Ma goreyê menfeatê şarê xo têgêrenê. Coka ma sebr kenê. Hêrişê Îranî goreyê menfeatanê şarê Rojhelat û Îranî nîyo. Rejîm ganî nê hole fam bikero. Hetê bînî ra ganî wextê têkoşînî de ganî hêzê hetkarî paştî medê hêrişkaran. Ewro çar leteyanê Kurdistanî de şer est o. Rîyê koyanê berzan ê Kurdistanî ra hêrişkarî hêzanê hemkar û xayînan fînenê dewre. Warê ke embazê ma tede est ê, kontrayê xo şawitê nê waran. Nê kontrayan bi nameyê şarî reyde pêvînayîşî kerdî. Gerîlayê Kurdistanî pê ehleq û kulturê xo yenê naskerdene. Coka ganî şarê ma bizano ke ma kam ma yê, kam kontra yê.”
Şarê Rojhelatî wazeno pîya bi şaranê Îranî biciwîyo
Fermandarê YRKyî Şîyar Şevgerî vist vîrî ke 2022 de dewleta tirke pê hemkarîya Îranî vera gerîlayanê Rojhelatî xeylêk hêrişî kerdî û vat: “Bitaybetî warê mendişî yê Asosî de hêrişê teyarayanê şerî yê dewla tirke bêmabên dewam kerd. Warê Şahoyî de embaze Rukene şehîde bîye. Reyna embazê ma Rêzan, Bawer, Serhed û Sîrwan zî hêrişê dewleta tirke de şehîd bîyî. Îran de hinda wextê bedilnayîşî ameyo. Şarê Rojhelatî wazeno pîya bi şaranê Îranî biciwîyo, la rejîmê Îranî vera şaran sîyasetê înkarî rayra beno. Eke Îran nê qanûnan û sîyasetê xo bibedilno eşkeno bibo dewleta tewr averberdoxe ya Rojhelatê Mîyanênî. Eke rejîm bedişnayîş mekero, bedelê ci giran bî zî şar do şoriş bikero.Wa rejîm nê hole bizano; eke pê qikerdişan şiro şarî ser , şar mecbur maneno ke xo bipawo. Şaran par zaf şehîdî dayî. Heta inkey 500 şehîdî est ê. Ewro ra tepîya ganî peyser game mero eştene. Ganî şarê ma 2023 de têkoşîn xo girdêr bikero.” BEHDÎNAN
