Endama Komîteya Zîndanan a Koordînasyonê Partîya Azadîya Cinîyanê Kurdistanî (PAJK) Nejbîr Sêrte Radyoya Dengê Gelî rê derheqê ante tecrîdê vera Rayberê Şarê Kurdî Abdullah Ocalanî û tedayanê zîndanan de qisey kerd.
Qiseykerdişê Nejbîr Sêrte ra tay qismê girîngî wina yê: “24 serrî yo Rayberîya ma binê tecrîdêkê giranî de ya. Vejîya werte ke Rayber Apoyî zîyaretê CPTyî de Îmrali de pêvînayîşê bi înan red kerdo. CPT qaşo vera îşkenceyî têgêreno la goreyê ney tênêgêreno. CPT goreyê menfaetanê dewletan, goreyê NATOyî û dewleta tirke têgêreno. Qesawetê şarê ma zêdîyenê û şarê ma wazeno Rayberê xo ra xeberêke bigêro. Eşkera yo CPT peyê perdeyî de tay kayan virazeno. Seba ke Rayberê Apoyî ra xeberêke bêra girewtene ganî çalakîyê bitesîrî bêrê kerdene. Xora çar parçeyanê Kurdîstanî de, koyan de, teberê welatî de û zîndanan de seba Rayber Apoyî xoverdayîş û têkoşînêko bêhempa yeno kerdene. Eke ma têkoşînê xo pîl bikerê o çax CPT mecbûr maneno ke eşkerayîyêke bido. Cezayê dîsîplînî yê ke dîyenê Rayberîye seba astengkerdişê pêvînayîşan o. Rayber Apo merdimêko normal nîyo, o lîderê şarêkî yo. Ganî CPT cade eşkerayîyêke bido.”
Îqtîdar keno ke pê teda û şîdetî şarî bigêro binê kontrolê xo
Sêrte qiseykerdişê xo de qala kayanê dewleta tirke kerd û vat: “Vakurê Kurdistanî de îqtîdarê AKP-MHPyî vera şarê ma şerê taybetî keno. Îqtîdar heman polîtîkayanê şerê taybetî vera zîndanan zî ano ca. Îqtîdarê AKP-MHPyî keno ke pê teda û şîdetî şarî bigêro binê kontrolê xo. Ewro koyanê Kurdîstanî de vera hêrişanê kîmyewîyan xoverdayîşêko pîl est o. Dewleta tirke bêguman pê hetkarîya NATOyî nê şerê gemarinî kena. Şarê ma ganî hîna zaf wayîrê gerîlayan, zîndanan û Rayberîye vejîyo. Vera şarê kurdî hêrişê topyekûnî est ê. Ganî ma bi cidîyetî nêzdîyê na raştîye binê û hîna bi xurtî wayîrê têkoşînê xo vejîyê.”
Ganî ma pê nê kayanê dişmenî mexapîyê û tecrîdê Îmraliyî pêro zîndanan de yeno caardene
Sêrte Radyoya Dengê Gelî de nê ercnayîşan zî kerd: “Dewleta tirke zîndanan de embazanê ma rê poşmanîye ferz kena. Embazê ma yê ke ciwanîya xo de tepişîyayê û 30 serrî yê zîndanan de yê, vera nêdîyenê. Embazê ma xora rixmê tedaya dewlete zî xo nêzdîyê poşmanîye nêkenê. Ganî ma pê nê kayanê dişmenî mexapîyê. Tecrîdê Îmraliyî pêro zîndanan de ewro yeno caardene. Embazê ma yê zîndanan xo rê xoverdayîşê gerîlayan sey çimeyê hêz û îlhamî gênê û sey gerîlayan vera kerdişanê dişmenî têkoşîn kenê. Heta ke Rayberê ma azad nêbo vera zîndanan zî nê hêrişî do dewam bikerê. Ma pê bawer ê ke 2023 de Rayberê ma do azad bibo û zîndanan de teda do biqeda.”
Sêrte ra vengdayîş
Sêrte tew peynî veng daye û vat: “Ma venga şarê kurdî danê ke vera tecrîdê Îmraliyî wayîrê Rayberîye û zîndanan vejîyo. Ganî pêro warê huqûqî de zî şarê ma wayîrê embazanê ma vejîyo. Avûkatê Rayber Apoyî eşkenê seba pêvînayîşî hîna zaf muracatî bikerê. Ma pêro embazan selam kenê û her kesî rê serkewtiş wazenê.” BEHDÎNAN
