Roja pêncşemê 19’ê meha çile 40 roj di ser şehadeta Rênas Amed, Arîn Mîtan û Serdar Rojhilat re derbas dibe. Rênas Amed tevî 2 hevalên xwe di 10 meha kanûna 2022’an de li tepê Ortê yê çiyayê Metîna bi lehengî şer kirin û şehîd bûn. 3 lehengên ji 3 parçeyên Kurdistanê bûn, yek ji bakur, yek ji rojava û yek ji Rojhilat li kêleka hev şehîd bûn.
Bi boneya 40 rojiya şehadeta van hersê hevalan Rênas Amed, Arîn Mîtan û Serdar Rojhilat ev helbest hatiye nivisandin. Bila ev helbest diyarî rewanê hemû şehîdên doza kurd û Kurdistanê û hemû dayik û bavên şehîdan be.
Oxirbe berxê bavê min
Tuyê bigihîjî rêhevalên xwe
Yên ku te tola wan li erdê nehişt
Ji wan re behsa çîrokên tolhildanê bikî
Em ê jî wek kundên li ser kavilan
Çend rojan şînê bixwînin
Û dîsa vegerin xewa xwe ya mirinê
Oxirbe Berxê dayika xwe
Her navê rêhevalekî te aşkera dibû
kurpînî ji dilê dayika te dihat
Heta ku te ji nişkan ve
Bê his û xeber
Çiyayê metîna bi carekê re bi ser dilê me de herifand
Berxê dayika min
Bi salan em di nava ecacoka Cizîra Rojavayê dil de
Li şopa te digeriyan
Te li Metîna li tepê ortê
Mayînek
Di orta dilê me de teqand
Berxo
Te têra xwe çiya hembêz kir
Êdî dora hembêzkirinê ya çiya ye
Fermandaro
Rewanê rêhevalên beriya te
Bi vê koça te haydar bûn e
Niha çavên wan di rê de qerimiye
Xwe zû bigihîne Elîşêr û Çekjîn
Ji wan re behsa
Çîrokên xwe yên tolhildanê bike
Oxirbe berxo
Ji xwe wensa te li van şevbêrkên me nayê
Şevbêrka miriyên di şanoya jiyanê de
Destê rêhevalên xwe Arîn Mîtan û Serdar Rojhilat bernede
Wan li şûna min hembêz bike
Biçe berxo
rê heval li benda te ne
lê di bextê te de me
ji wan re qet behsa
xewa me ya mirinê neke
bila Amedê di hişê wan de bimîne paytexta dilan
bila Amedê di çavên wan de bimîne dergûşa Çiyager
bila bimîne kela berxwedêr
dibe ku rojekê ji vê xewê rabe
ji bo navê xwe wiha bike
ji bo madê xwe nequrmiçînin
Dema tu bêjî
Ez Rênasê Amedê me
Bila rêhevalên te nizanibin
em di xewa mirinê de ne
bila bi gotina Amedê re
serhildanên ku pêşengî û şahidiya wan kiribûn werin ber çavên wan
De bi xatirê te Berxo
Bila Metîna û tepê Ortê
Li ba xwedê
Bibin şahidê wêrekiya te û rêhevalên te
Bila pîroz be li wan çiyan
cangorî û Şehadet we
Wekî min ji hemû rêhevalên te re got dîsa dibêjim
Ew ked û tekoşîna we
Ew xwîn û xwêdana we
Wê siberojê tev bibin çem û kanî
Û bi ser gerdena welatekî azad de biherikin
Wê hingê
Ez ê ji nû ve li pey şopa te bikevim
Vê carê navnîşana te heye
Ez ê li hemû kozikên çiyayê Metînayê bigerim
Ez ê li girê Ortê zinar bi zinar
Serê xwe deynim ser çoga wan tehtan
Û li çîrokên lehengiya te guhdarî bikim
