Endamên Partiya Sosyalîst a Bindestan (ESP) û Federasyona Komeleyên Ciwanên Sosyalîst (SGDF) li dijî tecrîda li ser Rêberê Gelê Kurd Abdullah Ocalan û binpêkirinên mafan ên li girtîgehan dest bi greva birçîbûnê kiribûn. Çalakiya greva birçîbûnê ya li Stenbolê didome.
Piştî çalakiya greva birçîbûnê ya 3 rojan ku di 16’ê Çileyê de li ber Girtîgeha Kiriklar a Îzmîrê hat destpêkirin, endamên ESP û SGDF’ê li Şaxa Komeleya Mafê Mirovan (ÎHD) a Stenbolê kom bûn û diyar kirin wê çalakiya xwe li Stenbolê bidomînin.
Endamên ESP û SGDF’ê, Seroka Şaxa ÎHD’ê ya Stenbolê Gulseren Yolerî, parêzerê OHD’yî Baran Çelîk beşdarî civîna çapemeniyê bûn. Civîn bi şîara “Em hevgirtinê bilind bikin, tecrîdê bişkînin” li avahiya komeleyê hate lidarxistin.
Di civînê de destpêkê Seroka Şaxa ÎHD’ê ya Stenbolê Gulseren Yolerî axivî û diyar kir ku binpêkirinên mafan ên li dijî girtiyan roj bi roj zêde dibin.
Zuleyha Mûldûr li ser navê Rêxistina ESP’ê ya Stenbolê teksta çapemeniyê ya li ser mijarê xwend, diyar kir ku girtiyên nexweş yek bi yek jiyana xwe ji dest didin.
Mûldûr da zanîn ku binpêkirinên mafan ên herî giran li dijî Abdullah Ocalan ê li Girtîgeha Îmraliyê di bin tecrîdê de ye tê kirin û got, “Rêberê Gelê Kurd Abdullah Ocalan bi tevahî ji cîhanê hatiye qutkirin.”
