Hate îdîakirin ku li navçeya Geverê ya Colemêrgê Ferhat Atilgan (26) ê ku duh saet 16:00’an de ji bo îfadeyê bide çû edliyeya Geverê, piştî ku derbarê wî de biryara girtinê hatiye dayîn xwe ji qata 3’yan a edliyeyê avêtiye. Atilgan ê ku bi giranî birîndar bûbû rakiribûn Nexweşxaneya Dewletê ya Geverê, lê jiyana xwe ji dest da. Cenazeyê Atilgan piştî otopsiyê li goristana Bajêrgê hate veşartin.
Parêzerê Atilgan diyar kir ku Atilgan bi hinceta ku şopa destên wî di sala 2015’an de li ser lepikek ku molotof pê hatiye çêkirin derketiye, ji aliyê dozger ve bi daxwaza girtinê sewqî Dadgeha Cezayê Sulhê hatiye kirin, lê di der barê wî de biryarek girtinê ya teqez nehatiye dayîn.
Her wiha heta niha têkîldarî mirina guman a Atilgan daxuyaniyek fermî ji aliyê dewletê ve nehatiye dayîn.
