Li navçeya Nûrdagiya Dîlokê ku bi ser 40 hezar nifûsa wê heye re hema bêje avahiyek ku xesar nedîtibe tune ye. Ev navçe li ser rêya bejahiyê ya Dîlok û Edenê ye. Kurd ji vir re dibêjin “Gawir Dagi”. Pir û viyadukên li Nûrdaghiyê xesarên mezin dîtine. Karesata erdhejê bandorek neyînî li navçeyê kiriye. Her çiqas tîmên rizgarkirinê hatibin navçeyê jî lê tiştek ewil tê pêş çavan dîmenên karesatê ye.
Kesên ji erdhejê xelas bûne li derûdora kavilên avahiyên sekinîne û ji bo xizmên xwe yên di bin kavilan de dilorînin û bi xemgînî disekinin.
15 saet şûnve hatiye rizgakirin
Welatiyê bi navê Hasan Ozpinar ku 15 saet şûnve bi birîndarî ji binê kavil hat derxistin û lawek wî di bin kavil de jiyana xwe ji dest da got: “Ez bi xêra xalê xwe ji bin kavil derketim. AFAD û mafad tune bû.”
Cenaze bêxwedî hatine hiştin
Welatiyê bi navê Veysî Gonul jî li taxa Ataturkê li ber kavilê avahiyekê sekinî ye ji Stenbolê bi hawara xizmên xwe hatiye û destnîşan dike ku cenazeyên tên derxistin bêxwedî ne û tevî hişyariyên wan jî kes li wan û cenazeyan xwedî derneket. Gonul banga piştevanî û alîkariyê kir. Gonul anî ziman ku rewş gelek dijwar heye û ew bi derfetên xwe cenazeyên xwe derdixin û mirov di rewşek şerpeze de ne.
Cenaze bi kamyonan veguheztine
Xebatkarê dilxwaz ê AFAD’ê ku hatiye navçeyê jî nexwest qeyda deng û dîmen û wêneyê wî bê girtin hin agahiyan da. Xebatkarê AFAD’ê destnîşan kir ku rewş li navçeyê gelek xerab e û wiha got: “UMKE’yê dibistana li kêleka petrola OPET’ê ku ez navê wê nizanim veguherandiye morgê. Tîmên lêgerîn û rizgarkirinê nayên navçeyê. Cenazeyên me derxistin, me bi kamyonên hafriyatê veguhezandin. Me bi kamyonê cenaze bir, wek din wê çi bibe. Kon nayên herêmê. Bi sedan cenaze hatin derxistin, dibe ku hejmara miriyan bigihîje bi hezaran. Hê jî mirov di bin kavilan de ne. Xebat pir hêdî ye. Li navçeyê xaniyek ku xesar nedîtibe tune ye. Heke wisa bi rêve biçe dê heta du salan ancax xebata li ser kavilan temam bibe.”
