Endamê Konseya Rayberdişî ya KCKyî Mustafa Karasuyî derheqê erdlerzê Vakurê Kurdistanî de eşkerayîye daye û semedê paştîdayîşî veng da.
Karasuyî sere de kesanê ke erlerz de dinayaya xobedilnaye rê hûmayî ra rehmet û birîndaran şîfa waşt, keyeyan û heme şarê Kurdistanî û Tirkîya rê serweşîye waşte û nê vatî:
”Raşta da zî erdlezê ke zaf gird o. Beno ke bi seserran o ke cografyaya Kurdistan û Tirkîya de erdlerzo winayên nêbîyo. Selahîyetdarê dewlete girdî û giranîya erdlerzî kenê şenik. Hûmara merdayan ke danê tay a. Xora ma zî wazenê hem rijnayîş hem zî hûmara merdayan tay bo. La ganî raştîyê bêrê vatene ke komel dahîna zaf paştî bido. Bi des hezaran merdimanê ma dinyaya xo bedilnaye. Hendê zî birîndar ê. Bi des hezaran keyeyî rijîyayî. Nimitişê na raştîye giranîya erdlerzî kena şenik. Nêzdîbîyayîşê giranî yê vera erdlerzî zehîf keno. Eslê xo de dewleta tirke bi nê hewayî kena ke raştîya xo binimno. Seba ke tedbîrî nêgirewtî, berpirsîyarîya xo nimnena. Nê hetî ra ma nê bişedetî şermezar kenê. Şarê ma ganî bi girdîya erdlerzî nêzdî bo û paştîdayîşî xurtêr bikero.
Rijnayîşo gird est o la dezgehê dewlete AFAD nêreseno ci, nêeşkeno bireso ci. AFAD nê erdlerzî de rijîya. Vejîya werte ke dezgehêko pûç o. Des bajar û bi hezaran dewî rijîyayî. Xora AFAD semedê nê amade nîyo. Xora dewlete semedê nê dezgehî butçe cîya nêkena. Derdê dewlete hemkar û paştgêranê xo zengîn bikero. Tedbîr çîn o. Erdlerzê 1999î de bacê erdlerzî dest pêkerd. Bi des mîlyonan dolar bacê erdlerzî ame girewtene. Pê nê AFAD eşkayêne xo xurtêr bikero û şaredarîyî eşkayêne xo amade bikerê. Felaketanê winayênan de hetkarîya dûrî rehet nîya. Coka ganî şaredarîyê na babete de zixm bê. AFAD têna semedê mojnayîş nayo ro. AFAD rijîya, qet cayêk de çîn o.
Paştîdayîşê komelî muhîm o. Çareyê esasî komel vîneno. Şarê Kurdistanî zanaye yo, cade beno çare. Wa dewlete ra çîyêk mepawo. Xora dewlete semedê komelî nêameya ronayene. Dewleta tirke xora dewletêka faşîst a. hêzê şerî ya. Pereyo ke semedê erdlerzî dîyayo arê tay rayîran rê tay zî şerî rê xerc kerd o. Tim xo wasifnenê vanê wina hêzê ma esto, wesayîtê ma yê şerî est ê la erdlerz de ganê şarî nêxelisnenê.
Ganî şarê ma Vakurê Kurdistan de, Sûrîye û Rojawan de her cade mîyanê paştîdayîşî de bo. Rijnayîş raşta zaf gird o, şertê zimistanî zehmet ê. Şarê ma ke Ewropa û metropolan de yo, ganî cade derdê mexdûranê erlerzî rê bibo çare, hem zî dima ra semedê înşakerdişê bananê mexdûran paştî bido. Nika xora dewî bêwehîr ê. Rewşa dewan xirab a. Dewê cîranî ke rewşa ci biney hol a wa dewanê bînan rê hetkarî bikerê. Ganî hetkarî her hetî ra xurtêr bo. Wa çew teber de û vêşan memano, her kes wa loqmeyê xo pare bikero, her çîyê xo pare bikero. Wayûbiratîye nê rojan de bewlî bena, cîrantîye nê rojan de bewlî bena. Merdimîye nê wextan de bewlî bena. Seba ke kesê ke binê rijnayîşî de bêrê xeslinayene ganî her kes bibo seferber. Ez na çarçewe de dejê şarê ma û heme şaranê bînan pare kena.” BEHDÎNAN
