Amed zî erdlerzê 6ê sibate de pê ame de bi tesîr bi. Erdlerz de 2 blokê Merkezê Kargehan ê Dîyar Galerîa yê serê Cadeyê Xarpêtî yê Yenîşehîrê yê Amedî rijyabî. Seba 2 blokê bînî zî qerarê rijnayîşî amebi dayîş. Ame dîyarkerdiş ke di blokê Ayî de 12 pisîngî, çukêke û kutikêke ci de yê. Pêwa nê ewro dest bi rijnayîşî kerdî.
Bloka Ayî ke 9 qat a û 36 daîreyê ci estê de 14 heywanî paweyê xilaskerdişî yê. Labele pêwa nê zî rijnayîş ame destpêkerdiş. Goreyê agahîyê ke heskerdoxan ra ameyî girewtiş çuçike peraya û xilaa bîya, labelê heywanêk netîceyê rijnayîşî de merdo.
12 heywanîye zere de yî
Heskerdoxa heywnan Şîlan Koyuncuya ke verê awanîye de vindertişê xo domnena ard ziwan ke 12 heywanê aye ham zî zerre de yî û seba înan tu mudaxale nîno kerdiş. Şîlane dîyar kerd ke aye seba heywanan 16 roje xover daya û wina vat: “Ma nê heywanan bixelisnî. Heme STK û federasyonî paştîdayîşê ma kenî. Ma hewl danî ke îna bixelisnî. Verê çimanê ma de nê heywanan mirnenî. Seba ke bêrî xelisnayîş ganî di linge înan bibî û qisey bikerî? Ma xo resna heme federasyon û heskerdoxê heywanan la tu çîyêk nêkenî. Ma wazenê ke heme bêrî paştî bidî. Nika ke erê nêbîyo.”
‘Qey seba nê rijnayîşî hende lez kenî?’
Serpîl Onena ke bloke Aye de cuyayêne û nika awanîya aye yena rijnayîş dîyar kerd ke destur nêdanê ke birînanê o bipişnî û vat: “Awanîye tewrê kelepulê ma yê ke tede yî do bêra rijnayîş. La do birînê ma tepîya nêagêrî. Qey seba nê rijnayîşî hende lez kenî? Ez 22 serrî yo ke na awanîye de cuyena. Vatî ke xeylê riskin a. La 3 saeto ke hema zî nê rijnayî.”
Sewbîna wexto ke rijnayîş pê ame hewrê tozî vilayê hewaye bîyî. Rijnayîşê awanîye hema zî dewam keno. AMED
