Çalakvanên medyayê yên Iraqî dîmen û wêneyên çemê Dîcleyê ji parêzgeha Meysan a başûrê Iraqê belav kirin. Di wêneyan de diyar dibe ku çem ziwa bûye. Çem ji ber gelek sedeman ziwa bûye. Sedema sereke jî Bendava Elîso ku dewleta tirk ya dagirker li bakurê Kurdistanê nû ava kiriye ye.
Li hember nêzîkatiya dewleta tirk ya dagirker di mijara ava çemê Dîcleyê de, di nava gelek aliyê siyasî yên Iraqê de bertek derketin. Hejmareke parlamenteran bang kir ku li ser vê yekê bersiva dewleta tirk bê dayîn û nehêlin ku ew bi damara jiyanê ya li Iraqê bilîze.
Beriya çend rojan Wezareta Çavkaniyên Avê ya Iraqê bi daxuyaniyeke fermî, nûçe û gotegotên li ser berdana mîqdarên mezin ji avê ber bi xaka Iraqê ve piştî erdhejê, derewandin û da zanîn ku çemê Dîcleyê di qonaxa herî krêt re derbas dibe.
Dewleta tirk bi rêya Bendava Elîso, ava çemê Dîcleyê, bi rêya Bendava Ataturk jî ev zêdetirî du sal in ava çemê Firatê, bernade.
Pisporên jeolojiyê diyar kirin ku yek ji sedemên erdheja wêranker a li bakurê Kurdistanê, herêmên Tirkiyeyê û Sûriyeyê çêbûye, bendavên mezin in yên ku 670 milyar metrekab av li pişt xwe digire. Dewleta tirk hê jî avê bernade û jiyana bi milyonan mirovên li bakurê Kurdistanê û Tirkiyeyê di xeteriyê de dihêle.
Dewleta tirk çemên di zêdetirî dewletekê re diherikin, di şerê li dijî gelên Sûriye û Iraqê de bi kar tîne û ji beriya 5 salan de bi rêjeya ji sedî 60-70 para herdu welatan ji ava çemên Dîcle û Firatê didize.
