Hemsereka Konseya Rayberdişî ya KCKyî Besê Hozaat beşdarê bernameya taybetî yê Medya Haberî bîye û derheqê erdlerzî de qisey kerd. Hozate ard ziwan ke bacê erdlerzî bi serran o ke şarî ra yeno arêdayene û seba şerî yê vera kurdan, rant, trol û çeteyanê AKPyî yeno xerckerdene û şar do hesabê ney biperso, do hetê înan de nêmano.
Besê Hozat îqaz kerd ke dewlete, wayîrê planî ya ke ê herêman ra kurd û elewîyan pak bikera. Nê teqir planê dewlete yê qirkerdişî est ê û vat: “Seba puçkerdişê nê çîyî gere şar herêmanê xo terk nêkero. Herra xo, erdanê xo, keyeyê xo û mal û mulkê xo meroşê dewlete rê. Eke no paştîdayîş dewam bikero ma eşkenê dewe û bajaranê xo newe ra awan bikerê.”
Felaketa seserre îqtîdaro faşîst AKP-MHP bi xo yo
Hozate dewamê ercnayîşanê xo de vat: “Tirkîya û Kurdistan herêma erdlerzî ya. Yanî na rastîyêka ke yena zanayene. La belê heta nika goreyê na rastîye muqaweleyê awanîye nêameyo viraştene. Goreyê na rastîye tedbîrî nêameyê girewtene. Bajar û dewî goreyê na rastîye nêameyê awankerdene. Bacê ke 1999î ra heta 2023 ameyê arêdayene, seba erdlerzî nêameyê xerckerdene. Bêguman na babetêka muhîm a.”
Gelo ‘felaketa seserre’ no erdlerz bî yan zî îqtîdaro nikayin o
Hozate dîyar kerd ke nika erdlerzêk virazîya û bî felaketêka girde ya û domna: “Îqtîdar vano na ‘felaketa seserre’ ya, çapemenîyê îqtîdarî zî wina nîşan danê. Gelo ‘felaketa seserre’ no erdlerz bî yan zî îqtîdaro nikayin o ke bî sebebê na felakete? Ma bi eşkera vanê, felaketa rastêne îqtîdaro faşîst o. Erdlerz afatêka xozayî ya û her cayê dinya de beno. Oyo ke erdlerzî keno felakete îqtîdar o û merîfetê ey ê.”
Ê şarî nezan hesibenenê
Hozate ard ziwan ke Erdogan vano, ‘No qeder o, gere merdim seke no planê qederî yo, wina biewnîyo ci ra’ û dewam kerd: “Qezayê madenan de bi seyan însanî mirenê, ê benê qeder, erdlerzî de bi des hezaran însanî mirenê, erdlerz beno qeder. Laserî wirzîyenê, xeylê herême û kuçeyî binê awe de manenê û şar binê awe de mireno, no beno qeder. Her çîyî ra vanê qeder. Yanî însanan nezan hesibnenê, vanê ez se vaja nê mi ra bawer kenê, ez eşkena înan bixapêna. Vanê qey şar nezan o.”
Êdî şar qederê Erdoganî dîyar keno
Hozate ercnayîşanê xo de înan vat: “Êdî rasta zî şar qederê Erdoganî dîyar keno. Sebebê hende merg û rijîyayîşan îqtîdar o. No rast o. No îqtîdar kerd ke no erdlerz bibo felaketêke. Îqtîdar bi xo felaket o. Çunke no îqtîdar na cografya qurbanê ranthesan kerde.”
Tirkîya û Kurdistanî de şar yeno qirkerdene
Hozate ard ziwan ke çîyo ke nika Tirkîya û Kurdistanî de beno, qirkerdişê komelî yo û vat: “Xeylê bajar, qeza û dewê înan pêro rijîyayê, Hatay, Semsûr, Dîlok, Meletî û Mereş. Dewa û merkezê înan bi temamî orte ra wedarîyayê. Walîyê Şirnexî vano, êyê ke merdî 5 qatê hûmara resmî yê. Yanî 200 hezar kesî merdî û hema zî binê xirban de cenazayî est ê. Bi kepçeyan, meyîtan vejenê, hurdî hurdî kenê şar cenazayanê xo nêşinasneno. Çîyo ke uca de beno, qirkerdiş o! Înan na cografya kerda goristanêk.”
Ê şarî tehtîd kenê, şar do hesabê ci biperso
Hozate tewr peynî wina vat: “Qet rexnedayîşêk yan zî şerm înan de çin o. Merdim seba çi şerm keno? Eke exlaq ey de est bibo, hîssî est bibê, wijdan est bibo, o wext merdim şerm keno. Biewnê Erdoganî ra. O, Bahçelî û Akar şarî tehtîd kenê, herinda ke biney şerm bikerê. Muxalefetî tehtîd kenê, hêzanê demokrasîyî tehtîd kenê. Çunke sûcê înan xeylê gird o. Sebebê na felaket ê. şar do hesabê ci biperso. Înan komelî qir kerdî. Nê dej û travmayî wina yê ke şar nêeşkeno demêkê kilmî de xo ser ra bierzo. Do bi serran bi des serran dewam bikero. Do hişê şarî de bibo birînêka girde û do hesabê ci bêro persayene, hetê înan de nêmaneno.” BEHDÎNAN
