Însîyatîfê Şar ê Vakur û Rojhelatî vera tecrîdê serê Rayberê Şarê Kurdî Abdullah Ocalanî kampanayaya îmzayan daybî destpêkerdene. Wexto ke kampanya biqedîya ê îmzayî do bi nameyê Buroyê Huqûqî ê Asrinî bierşawîyê CPTyî.
Endama Meclîsê Pêroyî yê Partîya Yewîya Demokratîke (PYD) û vervatoxa kampanya Perwîn Yûsife derheqê babete de ANFyî rê qisey kerd.
Perwîne ard ziwan ke Hêrêma Cizîrî ra kampanya qedîyaya û heta nika 800 hezarî ra zafêr îmzayî ameyê arêdayene. Pewîne dîyar kerd ke şarê Vakur û Rojhelatî nê îmzayî xo sey wezîfeyêkî dîyî û vat: “Şarê Vakur û Rojhelatî bi felsefeyê Rayber Apoyî pîl benê û nê felsefeyî qebul kenê. Bi serran o ke seba azadîya fîzîke ya Rayber Apoyî waran ra yê. Înan ra yew kampanyaya îmzayan a. Na kampanya waştişê heme şaran bîye. Bi beşdarbîyayîşê heme sazgeh, rêxistine û partîyanê sîyasî her kesan îmza daye. Nê îmzayî do CPTyî rê bêrê erşawitene. Şar wazeno ke wa goreyê qeyde û qanûnan têwbigêrê. Goreyê wezîfe û berpirsyarîyanê xo gere rastîye eşkera bikerê. Gere ma bi raya têkoşînî tecrîdî bişiknê. Dem demê azadîya fîzîkî ya Rayberê ma ya.”
Her zerrîwazî ra îmza ameye arêdayene
Perwîn Yûsife ard ziwan ke ê wazenê kampanya bi hewayêko serkewte biqedênê û vat: “Seba kampanya her bajarî ra komîteyî ameyê awankerdene û bi paştîdayîşê komun û meclîsan kampanya ame rayberdene. Herêma Cizîrî ra kampanya qedîyaye la herêmanê Firat û Şehba ra dewam kena.”
Şarê ma bi eşqêko xurt beşdar bî
Perwîn Yûsife dîyar kerd ke kampanya ra dima ê do cewabê CPTyî taqîb bikerê û vat: “Barê ma her roje hîna giran beno. Beşdarbîyayîşê şarê ma yê kampanya bi hewayêko xurt bî. Bi eşqêko xurt şar beşdarê kampanya bi. Şarê ma girêdayîya xo ya Rayber Apoyî bi na kampanya reyna nîşan da. Şarê ma paweyê cewabê CPTyî yo. Ma do taqîb bikerê û bê mabên têkoşîn bikerê.”
