Bi pêşengiya Tevgera Jinên Azad (TJA), Meclîsa Jinan ya Partiya Demokratîk a Gelan (HDP) jin li Islahiyeya Dîlokê ya ku erdhejê lêxist hatin gel hevdu û li ber navenda kriz koordinasyona krîzê daxuyanî dan. Aktivîstên TJA’yê, serokwekîla HDP’ê Meral Daniş Beştaş, Parlamentera HDP’ê ya Enqereyê Filiz Kerestecioglu, Parlamentera HDP’ê ya Wanê Muazzez Orhan, Cîgira Hevserokatiya Giştî ya Partiya Sosyalîst ên Bindestî (ESP) Beycan Taşkiran û gelek jin tevlî daxuyaniyê bûn. Jinan bi fularên xemrî 8’ê Adarê pêşwazî kirin.
‘Bi hêrseke mezin 8’ê Adarê pêşwazî dikin’
Endama Meclîsa Partiyê ya HDP’ê Beybûn Aslan, da zanîn ku ji ber erdheja li Kurdistan, Tirkiye û Sûriyeyê ew bi xemgînî û bi hêrseke mezin 8’ê Adarê pêşwazî dikin û got:”Mixabin polîtîka li ser dijminatiya li dijî jinên kurd û şer hatine avakirin. Sedema ku encamên erdhejê ewqas giran bûn, rastiya şer a heyî ye.”
‘Em ê jiyanê ji nû de ava bikin’
Beybûnê bi lêv kir ku di şerê li dijî civakê de dîsa jêderkên civakê tên bikaranîn û wiha got:”Loma di rojên felaketê de hewldanên kapîtalîst çêbûn. Hişmendiya serdest, baviksalarî û ya bi hezaran kes qetil kir di vê pêvajoyê de di bin kavilan de ma. Lê em ê jiyanê ji nû de ava bikin.”
Serokwekîla HDP’ê Meral Daniş Beştaş jî peyama mezinkirina piştevaniyê da û got ew li qadan bi erdhejzedeyan di nava piştevaniyê de ne û got li cihên erhejê dewlet tune bû. Her wiha Meralê da zanîn ku jin ne bi tenê ne û got ji bo hinek be jî em êşa erdhejzedeyan sivik bikin çi ji destên me bê em ê bikin.
Piştî daxuyaniyê jinan alavên pêdiviyê amade kirin û li kamyonetan bar kirin.
