Jinên taxên Şêxmeqsûd û Eşrefiyê yên Helebê û yên Minbicê bi meşên bi dirûşma “Bi Jin, Jiyan, Azadî ber bi şoreşa jinê ve” 8’ê Adarê pîroz kir. Jinan soza domandina têkoşînê heta pêkanîna armancên xwe da.
ʹEm yek inʹ
Xaliya Kejwan a ji pêkhateya ereb bi cilûbergên xwe yên erebî tev li meşê bibû got: “Ez vê rojê li tevahiya jinên cîhanê pîroz dikin. Ez tev li jinên Helebê bûme da ku vê rojê bi reng û çanda xwe pîroz bikim.”
Xaliye Kejwan wiha domand: “Tevî zehmetiyên li Sûriyê û kareseta ku qewimiye, em îro li vir in da ku ji cîhanê re îsbat bikin ku em ê bi îradeya xwe ya xurt berxwedanê li hember pergalên zordest bidomînin û armancên xwe pêk bînin.”
Xaliya Kejwan bang li jinên Sûriyê kir û got: “Ol, mezheb û neteweyên yên me çi dibe bila bibe, divê bibin yek da ku em azarên jinên sûrî û tevahiya gelê Sûriyê bi dawî bikin.”
ʹRoja Jinan a Cîhanê li jinên cîhanê û Rêber Abdullah Ocalan pîroz bikimʹ
Roşîn Mûsa ya ji pêkhateya kurd got: “Ez bi rengê xwe yê kurdî tev li vê meşê bûme ji bo ku em Roja Jinan a Cîhanê li jinên cîhanê û Rêber Abdullah Ocalan pîroz bikim.”
Roşîn Mûsa anî ziman ku bi rihê berxwedanê û bi saya fedakariyên şehîdan vê rojê bi beşdarbûna jinên ji hemû pêkhateyan pîroz dikin û got: “Ruxmî her tiştî em yek in.”
ʹ Em li ser soza xwe neʹ
Amna Xidiro ya ji pêkhateya turkmen e, bi zimanê turkmenî 8’ê Adarê pîroz kir û got: “Rêber Ocalan tovê şoreşa me çand. Em li ser soza xwe ne ku em ê xeta têkoşîn û berxwedanê berdewam bikin.”
Amna Xidiro destnîşan kir ku wek çawa ew wek kurd, ereb û turkmen ji bo azadiya xwe têdikoşin, dê ji bo azadiya fîzîkî ya Rêber Ocalan jî têdikoşin.
Minbic
Girêdayî mijarê, endama rêxistinên civaka sivîl ên Minbicê Henan Mihemed 8’ê Adarê li tevahiya jinên cîhanê û yên bakur û rojhilatê Sûriyê pîroz kir û destnîşan kir ku jinên bakur û rojhilatê Sûriyê bi saya fikrê Rêber Ocalan gihîştine vê astê. Henan Mihemed anî ziman ku jinên bakur û rojhilatê Sûriyê şoreşa Rojava veguhestin şoreşa jinan û hiştin ku ev şoreş ji jinên cîhanê re bibe nimûne.
Her wiha, berdevka Kombûna Jinan a Zenûbiya Riweyda Hinêzel anî ziman ku 8’ê Adarê sembola berxwedan û têkoşîn jinan a ji sedsalan e û wiha domand: ʹʹEm vê rojê li Rêber Ocalan pîroz dikin ku wî ji bo rizgarkirina tevahiya jinan ji bindestiyê têkoşiya.”
Di dawiya axaftina xwe de Riweyda Hinêzel got, heta rizgarkirina hemû jinên bindest û pêkanîna azadiya fîzîkî ya Rêber Ocalan ew ê tê bikoşin.
