Do Newroza ke her serre bi mîlyonan kesan tewrê ci benî, emserr bi şîarê “Her der Newroz, Her dem Azadî” û “Bi adirê Newroze ver bi azadîye ” bêra pêşwazîkerdiş. Newroze do bi rihê serewedarnayîşî 43 merkezan de bêra pêşwazîkerdiş. Do adirê yewine yê Newroza 2023yî 15ê Adare de Şemzînanê Colemêrgî de bêro tafînayîş.
Cinîyê ke Şemzînan de manenî dîyar kerdî ke do Newroza emserrî zî bi heyecan û coşêke gird bêra pêşwazîkerdiş û vat ke wa Newroze biba wesîleya aştî û azadîye.
‘Newroze seba cinîyan destpêkê azadîye ya’
Fatma Şenlîke da zanayîş ke tafînayîşê yewine yê adirê Newroza emserrî vera ê zaf heyecanin î û wina vat: “Ma seba amadekarîya Newroze fistanan deşt. Pîrozkerdişê Newroze yê yewine tîya de seba wayîrê manayêka muhîm a. Înşallah na Newroze biba wesîleya azadî û aştîye û biba wesîle ke berê zîndanan biabî. Newroze seba cinîyan destpêkê azadîye ya. wa hemwelatîyê Şemzînanî heme bêrî Newroze. Ma pîya do bi kelecanêk gird Newroze pêşwazî bikerî. Wa her kes Newrozanê verênan vîr bîyaro.”
‘Wa Newroz biba wesîleya aştî û azadîye’
Mevlude Gelîcîye zî dîyar kerd ke ê do raşteyanê Newroze de bi heyecan û coşêk gird Newroze pêşwazî bikerî û wina dewam kerd: “Ma do bi kincanê xo yê herêmî yê kurdî biherikî raşteyan. Newroze seba ameyîşê wisarî ya, ganî ma ameyîşê wisarî bi heyecan û têkoşînêk gird pîroz bikerî. Ma heme hemwelatîyê Şemzînanî dawetê raşteyê Newroze kenî. Wa Newroze biba wesîleya aştî û azadîye.” COLEMÊRG
