Li Îzmîrê bi pêşengiya pêkhateyên Tifaqa Ked û Azadiyê, Newroz wê di 19’ê Adarê de saet di 13.00’an de li Qada Gundogdu pêk bê. Îsal ji ber erdhêjên navenda wê Mereş bû xemgînî hebe jî ji bo daxwazên azadî û wekheviyê wê gel li qadan bin. Jinan ji bo tevlibûnê bang kirin.
Endama Partiya Kedê Emîne Uyar da zanîn ku tevî hemû polîtîkayên zext û tunekirinê wê gel li qadan daxwazên xwe bînin ziman û got: “Di karaseta erdheja mezin de bi deh hezaran welatiyan jiyana xwe ji dest dan. Ji ber vê em Newrozê xemgîn pêşwazî dikin. Em ê hêrsa xwe ya li dijî bê tedbîran, derenghatina ekîbên xilaskirinê bînin ziman. Newroz wê îro bi awayekî xurt bibe wesîleya torên piştevaniyê. Em hemû gelan dipên. Wek Partiya Kedê em li Tirkiyeyê aştiyê dixwazin.”
‘Em ê daxwaza çûyîna desthilatdariyê bikin’
Ji Rêveberiya Partiya Tevgera Kedê Mizgîn Sumbul jî diyar kir ku bi sedema hilbijartinên li pêş plan dikin ku Newrozê bi coş pîroz bikin lê ji ber erdhêjên pêk hatine xemgîn pêşwazî dikin û wiha dirêjî dayê: “Bi erdhejê re jiyana me guherî. Newroza îsal wê bi armanca piştevaniya gelê herêma erdhejê bê kirin. Em hewl didin ku dakevin qadan. 19’ê Adarê roja yekşemê li Qada Gundogdu bin. Em her kesî divên dakevin qadan. Em ê ji bo jiyanek azad û wekhev vê desthilatdariyê bişînin. Em ê bi dirûşmên xwe yên ku desthilatdariyê bişînin li qadan bin.”
Ji Rêvebera HDP’ê ya Îzmîrê Nerîman Bîrlîkler jî nêrînên xwe anî ziman û diyar kir ku wê bi dirûşma ‘her der Newroz her dem azadî’ li qadan bin û bi coşa 8’ê Adarê li qadên Newrozê bin. Nerîmanê banga tevlibûnê di serî de li jinan û hemû gelan kir.
Ji Jinên Demokrat ên Nû Zîlan Tayboga jî daxuyakirin ku wê têkoşîna jinan û serhildana 8’ê Adarê bibin qadan û ji bo hesab ji pergala rizyayî bipirsin wê li Qada Gundogdu bin.
