32 partî û tevgerên siyasî yên Bakur û Rojhilatê Sûriyeyê bi daxuyaniyekê, banga bidawîkirina dagirkeriya dewleta tirk a li ser axa Sûriyeyê kirin. Daxuyanî li ber avahiya Komîseriya Bilind a Kar û Barên Penaberan a NY`yê ya li Qamişloyê pêk hat, nûnerên partiyan ên Bakur û Rojhilatê Sûriyeyê û endamên Kongra Star beşdar bûn. Beşdaran wêneyên şehîdên Komkujiya Cindirêsê, şaxên zeytûnê û alên partiyan hildan.
Di çalakiyê de daxuyaniya 32 partî û tevgerên ku 23`yê adarê di civîneke çapemeniyê ya hevbeş de ku li Navenda Lêkolînan û Têkiliyên Dîplomasî ya Bakur û Rojhilatê Sûriyeyê li Qamişloyê daye, dîsa hate xwendin.
Hevserokê Partiya Aştiya Demokratîk a Kurdistanê Telal Mihemed û sekreterê Partiya Demokratîk a Kurd li Sûriyê (Partî) Nesredîn Îbrahîm û endamê Partiya Yekitiya Suryanî Calînos Îsa daxuyanî xwend. Di daxuyaniyê de 32 partiyan bang kir ku dagirkeriya tirk a li ser axa Sûriyeyê bi dawî bibe û destnîşan kir ku Tirkiye û Îtîlaf berpirsên Komkujiya Cindirêsê ne ku çeteyên dewleta tirk a dagirker şeva Newrozê li Cindirêsê pêk aniye û di encamê de 4 welatî ji heman malbatê şehîd bûn. Partiyan bang li pêkanîna yekîtî û hevgirtinê ji bo bidawîkirina dagirkeriya tirk a li ser herêmên Sûriyeyê yên dagirkirî kir.
Piştî bidawîbûna xwendina daxuyaniyê, şandeyeke 32 partiyan, nameyeke nerazîbûnê bi zimanî îngîlîzî radestî Komîseriya Bilind a Kar û Barên Penaberan a NY`yê kir.
