Çeteyên Ehrar El Şerqiye yên dewleta tirk a dagirker şeva Newrozê (20`ê Adarê) li navçeya Cindirêsê li dijî welatiyên kurd komkujiyek pêk anî û di encamê de 4 welatî ji heman malbatê şehîd bûn û 3 din jî birîndar bûn
Der barê mijarê de sekreterê Partiya Demokratîk a Kurdistanê-Sûriye Ciwan Seko komkujî şermezar kir û got: “Ev ne cara yekê ye. Ji 5 salan ve dewleta tirk a dagirker û çeteyên wê sûcên herî hovane li Efrîna dagirkirî pêk tînin, demografiya wê diguherînin, şêniyan dikujin û direvînin, mal û milkên wan, şûnwaran talan dikin. Ev hemû sûcên şer in. Di çarçoveya qirkirinê û tunekirina dîroka kurdan li herêmê de pêk tên.”
Seko destnîşan kir ku partî û gelên herêmê dê bibin dengê xelkê Cindirêsê û Efrîna dagirkirî.
Her wiha Seko bal kişand ser xemsariya NY’yê, sazuyên navneteweyî, hiqûqî li hember sûcên dagirkeriyê û got: “Ev nîşan dide ku ew şirîkên wan in.”
Di heman demê de Seko bang li wan saziyan kir ku berpirsyariyên xwe bînin cih û dagirkeriya tirk a li ser axa Sûriyeyê bi dawî bikin, vegereke ewle ji bo xelkê Efrînê dabîn bikin.
Girêdayî heman mijarê sekreterê giştî yê Partiya Çepgir a Kurd li Sûriyeyê Mihemed Mûsa got: “Komkujî ji bo vemirandina agirê Newrozê pêk hat ku wan şehîdan pêxist. Ev delîla kîna dewleta tirk û çeteyên wê ya li hember kurdan e.”
Mûsa di awiyê de destnîşan kir ku divê siyasetmedar li hember komkujiyên wiha bisekinin, têkoşînê mezin bikin, planên dijminan têk bibin û her wiha got: “Divê saziyên navneteweyî erkên xwe bînin cih. Ji bo rizgarkirina herêmên xwe û avakirina sûriyeyeke demokratîk a pirreng, çi pêwîst bike em amade ne bidin.”
