Partîya Cuya Azade ya Kurdîstanî (PJAK) ya ke 4ê Nîsane de ameye ronayene ke rojbîyayîşê Rayberê Şarê Kurdî Abdullah Ocalanî yo, serrgêra xo ya 19. pîroz kena. Hemsereka PJAKî Zîlan Vejîne derheqê rojbîyayîşê Rayberê Şarê Kurdî û ronayîşê partîya ci de ANFyî rê qisey kerd.
Zîlan Vejîne vist vîrî ke PJAK prosesêkê tarîxî de ame ronayene û vat: ”Rojhelatê Kurdîstanî û Îran de seba ke hewce kerdêne partîya ma ameye ronayene. Komelê kurdan û bitaybetî ciwanê kurdan peyê gêrayîş û yew vejîyayîşî de bî. Vera rejîmê Îranî ke şarî rê şerîat ferz keno, têkoşîno rêxistinkerde çînêbi û têkoşînê hemparî hewce kerdêne.”
Vejîne bîyayîşê Rayberê Şarê Kurdî Abdullah Ocalanî semedê şaranê Kurdîstanî sey şansekî hesipna û vat: ”Seba ke partîya ma 4ê Nîsane de ameye ronayene, têkoşînê ma dahîna bimana yo. Xora verê ronayîşê partîya ma zî hayîya Rojahelatî fikr û felsefeya Rayber Apoyî bibî. Rojhelatî nê fikrî qebul kerdî û seba ke biresê azadîye wayîrê nê fikran vejîya. Senî ke bîyayîşê Rayber Apoyî bîyayîşê komelê kurdan o, bîyayîşê PJAKî zî yeno manaya bîyayîşê Rojhelatî. PJAK hinî semedê Rojhelat û Îranî bîyo hêvî. Şorişê Jin Jiyan Azadî na raştîye îfade keno.”
Hemsereka PJAKî Zîlan Vejîne vat: ”4ê Nîsane hêvîya serkewtişî ya. Roja sîstemê kapîtalîstî ra xelisîyayîşî û hîşyarbîyayîşê heme komelan a ke binê zilmî de yê. Bîyayîşê Rayber Apoyî semedê şarê kurdî yeno manaya bîyayîşê îdeolojî,fikr û felsefeyî. Felsefeya Rayber Apdî azadîya komelî, erjanê ehleqî û şorişê sîyasî û wîjdanî esas geno. Rayber Apo xelisnayîşê cinîyan xelisnayîşê netewe û welatî ra muhîm vîneno. No yeno no mana, eke cinî kole ya manaya azadîye û welatî çîn a. PJAK bi estbîyayîş û serkêşîya cinîyan dahîna hêzdar o. Şorişê Jin Jiyan Azadî yo ke serkêşîya cinîyan ê kurdan de dest pêkerd,bi têkoşînê şaran eşkeno ser bikewo.”
