6ê Sibate de merkezê ci Mereş de di erdlerzê girdi qewimîya û nê erdlerzî 11 bajaranê bînan de xisaran pê ard. 50 hezarî ra zêde kesî nê erdlerzî de dinyaya xo bedilnayî û se hezarî ra zêde kesî zî birîndar bîyî. Bobelatê erdlerzî ra dima 15ê Adare de bobelatê diyîne qewimîya. Her çend ke bi rojan îqaz ame kerdiş zî selahîyetdarî tedbir nêgirewtî û lasero ke werişt de Semsûr û Rihaye de 21 tenî dinyaya xo bedilnayî.
Taxa Ertugrul Gazî ya girêdayeyê qezaya Halîlîye ya Riha de çemê Sirrin serde şî û netîceyê qewimîyayîşî de keyeyêk sûrîyeyij ke 5 kesan ra pê ameyêne û qatê bodrumî yê awanîyêk de roniştêne dinyaya xo bedilnayî. Taxe de hema zî cereyan çin o û hema zî qatê bodrumî û dikanî binê awe de yê. Kreşo Taybet Damlaye ke 86 wendekar û 10 xebatkarê ci estbî û nizdîyê çemî de bî roja laserî ra nata girewte yo. Wayîra kreşî Mulkiye Demîre derheqê babete de ajansê JINEWSî rê qisey kerd.
‘Karkerî wêran bî’
Demîre da zanayîş ke seba kîşte çemî ameyê pirrkerdiş û mektebî ameyê viraştiş, çem ser de şîyo û wina vat: “Kreş rewşa ke bêro şuxulnayîşî de nîyo. Dimayê bobelatî, di rojî selahîyetdarî nêameyî. Ma terkê qedera ma kerdî. Beno ke reyna laser wurzo. La tu kes nêame hetkarî. Ma nêzanê ke do mexdurîyetê ma çareser bikerê yan nê. Seba ke soz ame dayîş la tu çîyêk nêame kerdiş. Tena hesabê mi de 10 hezar pere esto. 2 mîlyon zirarê mi esto. 10 hezar derdê mi rê nêbeno derman. Hûmarêka komîk a. Vernîya her çî kedêke pîl esta. Ma netîceyê îhmalkarîyê Perwerdeyê Neteweyî de na rewşe de yê. A roje bîne ke wendekarî zerre de bibayîne.”
‘Mi do kam ci dayîke ra bivatêne tuta to çin a…’
Demîre her reye de vana ma cinîyan rê îstîhdam awan bikerê la tu hetkarî ma rê nêamî û wina vat: “A roje beno ke tutî zî bibayîne. Gelo mi do kam ci dayîke ra bivatêne tuta to çin a? Awanîya kîşta ma de 5 cenazeyî vetî. Ma mexdûr ê. Ma tu çîyêk nêbenê. Nika rewşe sey xo ya. Her ca xetimnaye yo. Ma gêrenê kes nîno. Merdimî seba çîyêk qij kewenê pey belgeyan nêkewenê pey rewşa ma. Gelo ma do heta ça bimirê? No sazgehêk 16 serrî yo akerde yo. Bêşik her çî do sey verê nêbo. La ez wazena keda xo bigîrî.” RIHA
