Endamê Konseya Rayberdişî ya KCKyî Sabrî Okî Stêrk TVyî rê rojdem ercna. Qiseykerdişê Okî ra beşêk wina yo:
”Her kes zano ke dişmen 24 serrî yo serê Rayberîye ra vera şarê kurdî polîtîkaya qirkerdişî rayra beno û Rayber Apo vera nê xoverdyaşo gird dano. Seba ke Rayber Apo Îmrali de gerek ne şar ma ne zî heskerdoxê ey rehat bê. Newroza emserî de reyna şarê ma meydanan azadîya Rayber Apoyî waşte. Newroze bi ronayîşê PKKyî reyna resa manaya xo ya raşte. Coka ma vanê PKK partîya Newroze ya. Şarê ma Hewteyê Qehremanîye zî pîroz kerd. Şarê kurdî rêça embaz Mazlûm Dogan û Mahmsum Korkamzî de vera îşxalî vejîya, verê dişmenî de çok nêda. Dişmen nika bi hewayêkê wehşî hêrişê gerîlayan û şarê ma keno. Şarê ma gerek bi ruhê xoverdayîşî yê Newroze xoverdayîşê xo gird bikero.
Seke yeno zanayene têgêrayîşê ma wextê erdlerzî de berpirsîyarîya xo ya ehleqî û wîjdanî arde ca û çalakîyê leşkerî vindarnayî. Yanî heta ke dewleta tirke hêriş mekero, gerîlayî do çalakî mekerê. Qerarêko raşt bi. Ez naye vajî, xeylêk kesan, xeylêk dewletan, hêzanê mîyanneteweyî ge eşkera ge ge zî bi tewiranê cîyayan îdareyê ma rê xebere şawite, silamî şawitî û vat; eke şima rojêke qerarê adirbirnayîşî bigêrê, ma do rolê xo okay bikerê. Belka nê zî tesîrê qerarê ma kerd. Hêzanê ke adirbirnayîş watêne no qerarê ma dî la dewleta tirke nê qerarî nas nêkena. Nê sey firsetî vînena û dahîna zaf hêrişê gerîlayan kena. Reyna çekanê kîmyewîyan zî şuxulnena. HPG û KCKyî derheqê nê de eşkerayîye dayî û vat eke hêrişî mevindê, na rewşe wina dewam nêkena. Gerek nîyetê têgêrayîşê ma xirab nêro şuxulnayene. Ma vat erdlerz bi, Aşma Remezanî ya ma wina yew qerar girewt.
Beno ke îqtîdar verê vîjnayîşî provokasyon bikero. Eşkerayo ke do vîn bikero. seba ke vîn mekero çîyo ke destê ci ra yeno keno. Hêrişê wehşîyî yê vera gerîlayan her kes vîneno. HPGyî zî vat beno ke îqtîdarê AKP-MHPyî verê vîjanayîşî şerêk bido destpêkerdene. Çunke destê ci de çîyêk nêmend. Îqtîdar nêeşkeno sîyasetê Tirkîya bibedilno. Têna wazenê hêrişê PKKyî bikerê, îradeyê kurdan bişiknê û vajê ma ser kewtê, ma do reyna benê îqtîdar. Xora yewna şansê înan nêmendo. La ma Newroz de reyna dî ke ne şarê kurdî ne zî Rayberîye milê xo çewt nêkeno.
Komelê Tikîya zî nê îqtîdarî ra zaf dej ant. Ma zanê dewleta tirke do ewro ra tepîya dahîna wehşî hêrişê gerîlayan bikero. Çunke peynîya îqtîdarê ci yena. Hedef kenê ke hêriş bikerê la reyna zî do mexelisîyê. Nê demî de hewceyê şarê kurdî yewîya netweyî est a. Çew nêeşkeno bi qirkerdişan kurdan çîn bikero. Şarê kurdî est o, do tim bibo. Şarê kurdî wayîrê erjanê xo vejîyeno. Wa têna yewîye bibo. Gerek çar parçeyanê Kurdîstanî û tewberê welatî de kombîyayîş, platform, kongreyî bêrê kerdene. Seserra diyîn a Lozanî de babeta tewr muhîme na ya.” BEHDÎNAN
