Rêveberiya Xweser a Bakur û Rojhilatê Sûriyeyê roja 4`ê Nîsanê projeya avakirina avahiya Zanîngeha Rojava da destpêkirin. Proje li gundê Til Faris ê rojavayê Qamişloyê li ser 800 donimî tê avakirin û li ser asta Bakur û Rojhilatê Sûriyeyê projeya herî mezin e.
Plansaziya projeyê
Li gorî plansaziya projeyê, dê 12 avahiyên wargehê ji bo xwendekaran û cihên din ji bo fakulteyên zanîngehê bên avakirin. Rûpîvana her avahiyekê jî hezar 440 metreçargoşe ye.
Her avahiyeke wargehê dê ji 5 qatan pêk were, di her qatekê de odeyên xewê, cihên rûniştin û xwendinê û depoxane hene. Di jêrzemînên her avahiyekê de jî 3 strageh û holek hene.
Ji derveyî wargeh û avahiyên fakulteyan, dê 2 stad, sûk û holên werzîşê jî bên avakirin. Ji sedî 70`yê rûpîvana giştî dê ji bo dar û beran bê veqetandin.
Detayên projeyê
Endama Nivîsgeha Endezyaran a Zanîngeha Rojava ku yek ji berpirsên projeyê ye, Roza Mûsa der barê detayên projeyê, lêçûn û dema temamkirin wê de ji ajansa ANHA re axivî û ev agahî parve kirin: “Ev salek e amadekariya projeyê tên kirin. Desteya Darayî ya Rêveberiya Xweser a Bakur û Rojhilatê Sûriyeyê lêçûna projeyê girtiye ser xwe. Tenê lêçûna 2 avahiyên wargehan 30 milyon dolar e. Li her du avahiyên wargehê cihê 700 xwendekarî heye.”
Roza destnîşan kir ku ji ber cihên heyî yên fakulteyên zanîngehên belave , dê piştî temamkirina projeyê fakulteyan jî veguhêzin wê derê û der barê qonaxên avakirina projeyê de ev tişt gotin: “Piştî avakirina her du wargehan dê amadekariyên veguhastina Fakulteya Wêje û Zanistên Civakî bê kirin. Dê cihên wargeh û fakulteyan ji hev cuda bin û di navbera wan de mesafe hebe. Di demên pêş de hemû fakulteyên zanîngehê dikarin bên veguhestin.”
Li gorî Roza Mûsa, ji bo bidawîbûna projeyê bi temamî demek diyar tune ye.
