Şaristanê Hamburgî yê Almanya de bi şîarê ‘Vera Modernîteya Kapîtaleste Vejîyayîşî’ konferansê ‘Ma Dinyaya Xo Apey Wazenê’ yo 4. yeno kerdene. Konferans hetê Torra Cigêrayîşê Alternatîfî ya ke Komelê Azadî, Buroyê Seba Azadîya Cinîyan ê Kurdan (CENÎ), YXK, KURD-AKAD, Kovara Kurdistan Report zî beşdaranê ci ra yew ê.
Konferans vizêr startê xo dabi. Konferansê vizêrînî de Vervatoxa Meclîsê Cinîyan ê Kurdan ê Hamburgî Leyla Kaya hêverî qisey kerd.
Dima nameyê Yewîya Wendekaran a Unîversîteya Hamburgî ser o Luisw Dechowî qisey kerd. Dechowî vist vîrî ke waştişê Tirkîya ser o Unîversîteya Hamburgî nêverda konferans uca de bêro kerdene.
Komîteya Amadekarîye û Vervatoxanê Xîretê Ocalanî rê Azadîye ra Reimer Heiderî qiseykerdişê xo de, qedexeyê vera PKKyî rexne kerd û vat ke PKK rêxistinêka terorî nîya rêxistinêka têkoşînê azadîye ya.
Edebîyatkarê îskoçî James Kelmanî peynîya roja verêne ya konferansî de qisey kerd û da zanayene ke bi hezaran kurdî fikranê xo ra semed zîndanan de yê. Kelmanî vist vîrî ke teyna Abdullah Ocalan nê kesê sey şaîr Îlham Samî Çomakî bi serran o tepişîyenê. Kelmanî pare kerd ke hêzê globalî nêverdenê tecrîdê vera Ocalanî bêro wedaritene.
Konferans roja diyîne de dewam keno. Salona konferansî pê alayanê YPG û YPJyî, pankarta ‘jin, jiyan, azadî’ û fotografê Rayberê Şarê Kurdî Abdullah Ocalanî xemilîyaye. Bi taybetî medyaya mîyanneteweyîye zaf eleqe mojnena konferansî. Wekîla HDPyî ya Mêrdînî Ebru Gunay, Wekîlê verên o HDPyî Hatîp Dîcle û xeylêk temsîlkarê dezgeh û rêxistinan tewrê konferansî bîyî. HAMBURG
