Muslîmî pare kerd ke weçînayîşê 14ê gulane zaf girîng ê û netîceyê ci raşta raşte tesîrê Rojawanî do bikerê. Muslîmî vat: ”Rejîmê Tirkîya yo faşîst tim hêrişê Rojawan û Başûrî kenê û nê şerê vera kurdan ra semed Tirkîya mîyanê krîzan de ya. Weçînayîşê 14ê gulane seba kurdan û pêro şaran firsendêk o. Şarî eşkenê nê weçînayîşan de Erdoganê dîktatorî bişawê. La xora Erdogan seba ke îqtîdar de bimano do her çî bikero. No prosesêko hesas o. Beno ke şerê zereyî zî Tirkîya de vejîyo. Îqtîdarê AKP-MHPyî dişmenê pêro şaran o. Nê weçînayîşî do qederê Tirkîya bivurnê. Nê weçînayîşî seba Rojawanî zî krîtîk ê. Eke no îqtîdar ser bikewo do biwazo îşxalê Rojawanî temam bikero.”
Muslîmî bale ante ser ke erdlerzî ra verî îxtîmal est bîyo ke dewleta tirke hêrişê Rojawanî bikerdêne. Muslîmî vat: ”Îqtîdarê AKP-MHPyî eşkeno her hele şerêkî vejo. Ma pêro îxtîmalan ser o fikrîyenê û ma hê vera hêrişanê muxtemelan amadekarîya xo ya xoverdayîşî kenê. Erdlerz de zî dewleta tirke Rojawan dayêne bombayan ver. Ma mexapîyê; şer cîya yo, weçînayîşî cîya yê. Nînan de exlaq çin o. Xora nê çekanê kîmyewîyan ê qedexekerdeyan şuxilnenê.”
Muslîmî vist vîrî ke KCKyî prosesê erdlerzî de çalakîyê xo vindarnayê la rixmê ney zî dewleta tirke hêrişanê xo yê vera Başûr, Rojawan û Vakurî rê dewam kerdêne.
Hemserekê PYDyî Salih Muslîmî eşkera kerd ke mabênê keyeyê Erdoganî û keyeyê Barzanîyan de petrolî ser o hemkarîyê pîlî est ê. Muslîmî vat: ”Eke Erdogan û îqtîdarê ci birijîyê no do hem tesîrê Tirkîya, hem tesîrê Başûrî hem zî tesîrê Rojhelatê Mîyanênî bikero. Eke no rejîmo faşîzan şoro no do zaf tesîrê Başûrî bikero.” HESEKÊ
