Cemalî ard ziwan ke weçînayîşê 14ê gulane tarîxî yê û vat: ”Ma prosesêkê tarîxîyî de yê. 20 serrî yo Tirkîya bi hawayêkê xirabî yena îdarekerdene. Ganî efû pêroyî bêro îlankerdene û tepişteyê sîyasîyî vera bidîyê. Ganî no welat newe ra bêro awankerdene. Her çî ra ver ganî dewaya kurdan bêra çareserkerdene. Sîstemêko xirab est o. Ganî ma rejîmê tekperestî birijnê û bi komara demokratîke welatî newe ra awan bikerê. Eke ma nê rejîmê tekmerdimî nêrijnê çîyê xirabêrî do biqewimîyê.”
Cemalî bale ante ser ke girîng o ke Partîya Çep a Keske seba çareserîya meseleya kurdan û pêkerdişî Meclîs de bihêz biba. Cemalî ard ziwan ke yew mesele masa ser de çareser bena û vat: ”Ganî meseleya kurdan binê sîwana Meclîsî de bêra çareserkerdene. Heta ke na mesele çareser nêba qet yew mesele çareser nêbena. Prosesanê çareserîye de muxatabî est ê, ganî ma mabênê muxataban de kanalanê dîyalogî akerê. Ganî ma tecrubeyanê xo ra zî dersan bigêrê.” STENBOL
