Weçînayîşê serekkomarî û parlementerî yê welatî ke do 14ê Gulane pê bêro rê tay mend. Heme partîyê sîyasî lez dayî xebata xo ya weçînayîşî û buroyê weçînayîşî yenê akerdiş. Namzetê Riha yê Partîya Çep a Keske Omer Ocalanî derheqê xebatanê înan ê weçînayîşî de ANFyî rê qisey kerd.
Ocalanî da zanayene ke Partîya Çep a Keske nasname, kultur û bawerîyanê cîyayan ra yena pê û yewîya cîyatîyan xo rê kena esas. Ocalanî vat: ”Ma pê bawer ê ke partîya ma prosesê verê ma de seba çareserîya meseleya kurdan, meseleya bawerîye û çareserîya meseleyanê bînan Meclîs de do rolêkê kilîdî kay bikera. Ma seba ney amadekarîye kenê. Kilîd destê Partîya Çep a Keske û sîyasetê rayîrê hîrêyînî de yo.”
Ma rol û mîsyonê xo do bîyarê ca
Ocalanî bale ante ser ke komel prosesêkê hesasî ra derbaz beno û vat: ”Komel do mîyanê di blokan de teng nêbo. Ma do rayîrê hîrêyînî awan bikerê û sîyasetê xo xorin bikerê. Seba demokrasî destê ma ra çi bêro ma do bikerê. Ma bi perspektîfêkê hîrayî biewnê nê prosesî. Seba ke demokrasî bêra, kurdî nasnameyê xo bivisnê destî, kurdî bi ziwanê dayîke perwerde bivînê ma rol û mîsyonê xo do bîyarê ca.” ANQARA
