Namzetê Wekilîya Amedî yê Partîya Çep a Keske Mehmet Emîn Aktar Beşê Huqûqî yê Zanîngehê Stenbolî ra mezûn bi û 2008-2012 de zî serekîya Baroyê Amedî kerde.
Namzetê Wekilîya Amedî yê Partîya Çep a Keske Mehmet Emîn Aktarî derheqê weçînayîşan de ANFyî rê qisey kerd.
Aktarî vist vîrî ke ey xeylêk wextî heqanê merdiman ser o têkoşîn kerdo la bi hawayêkê aktîfî mîyanê sîyasetî de canêgirewto. Aktarî vat: ”Nê weçînayîşî zaf krîtîk ê. Coka mi teklîfê wekîlîye qebul kerd. Amed de şar zaf eleqe mojneno ma. Rixmo ke sîyasetmedarê ma raştê zaf tedayan ameyê şarê Amedî tim wayîrê yew potansîyelî yo. Bi taybetî 15ê Temmuze ra dima tedayê vera şarê ma zaf zêdîyayê. Şarê ma hêrsbîyaye yo. Ganî ma nê hêrsî sîyaset û xebatanê xo de bimojnê. Şarê ma visneno ma vîrî ke ma temsîlkarê ci yê. Coka ganî ma bi xurtî xebatanê xo bikerê.”
Aktarî venga pêro kesan da ke wa bêrê raya xo bidê û bale ante ser ke wa rayî bipawîyê. Aktarî vat: ”Şewdirê 15ê gulane de şarê ma do rojêka roşnî ya newîye rê haya bibo. Beno ke seba ma prosesêko hîna giran do dest pêbikero. Çunke ganî ma newe ra awan bikerê. Ganî ma sîstemê qanûnî newe ra awan bikerê ke no sîstem do bieşko meseleya kurdan çareser bikero. Mesele teyna şawitişê nê îqtîdarî nîya. Ganî ma verê îqtîdarêkê otorîterî yê muxtemelî zî bigêrê. Nê hetî ra Partîya Çep a Keske wayîrê yew pozîsyonî ya.”
