Serokê Federasyona Komeleyên Elewiyan Zeynel Abîdîn Koç anî ziman ku li nava Partiya Çepên Kesk nasnameyên cuda bêyî ku di nava dengekî de bihelin xwe temsîl dikin.
Koç ji ANF’ê re axivî û diyar kir ku ew temsîliyeta elewiyan a li Meclîsê kêm dibînin û ragihand, partî di asta saziyê de ji aliyê temsîliyeta elewiyan ve lawaz in, temsîliyet jî di asta kes de weke ‘wekîlê elewî’ dimîne. Koç got, “Mînaka Alî Kenanoglû girîng bû, weke nûnerê saziyekê bi HDP’ê çûbû meclîsê. Em temsîliyeta yekser gelekî girîng dibînin. Gelek komele û federasyonên elewiyan hene. Tenê ‘wekîlê elewî’ têrê nake. Pîrê me Celal Firat wê me temsîl bike, lê belê federasyonên me hemû divê ji bo mafê elewiyan ji bo têkoşînê li meclîsê bin.”
Zeynel Abîdîn Koç diyar kir ku piştî Celal Firat ji Herêma 3’yemîn a Stenbolê ya Partiya Çepên Kesk namzet hate nîşandan, wî wezîfeya Serokatiya Federasyona Komeleya Elewiyan dewr wergirtiye û têkildarî namzetiya Firat de got, “Me civîn lidar xist û pêvajoya hilbijartinê nirxand. Em federasyon in, bêguman di nava me de gelek hevalên ji nêrînên cuda yên siyasî hene. Em bi lihevkirinê ji wê civînê derketin. Weke nûnerê rêxistiniya elewî û têkoşîna mafê elewiyan, birêz Celal Firat bi hevgirtina dengan diçe. Me ragihand ku heta dawiyê em ê pê re bin.”
