Verê weçînayîşî ewro serê sibayî çarçeweya tehqîqatê Serdozgerîya Komare ya Amedî de 21 bajaran de operasyon dîya dest pêkerdiş. Netîceyê operasyonî de xeylê rojnameger, avûkat, sîyasetmedar û hunermendî ameyî destbendkerdiş.
Muxabîra ajasê JINEWSî Bêrîtan Canozer, wayîrê îmtîyazî yê Ajansê Mezopotamyaye (MA) Ferhat Çelîk, edîtorê MAye Abdurrahman Gok, rojnamegerê MAye Ahmet Kanbal, Mudirê Karê Nuştişî yê Rojnameyê Yenî Yaşamî Osman Akin û Wayîrê Îmtîyazî yê Rojnameyê Xwebûnî Kadrî Esen ameyî destbendkerdiş. Netîceyê sereştişê keyeyan yê rojnamegeran de dest dîya serê kitab û kompîturan ser. Seba ke Ferhat Çelîk keye de nêbî nêame destbendkerdiş.
Hemsereka Şubeyê Amedî ya Komeleya Huqûqnasê Seba Azadîye (OHD) Halîse Dakali, avûkat Resul Tamur, Ozum Vurgun, Bunyamîn Şeker, Berdan Acun, Pîrozhan Karaliye ameyî destbendkerdiş.
Tîyatroyê Bajarî yê Amedî ra Yavuz Akkuzu, Ozcan Ateş, Elvan Koçer Yildirım, Şahperi Alphan Bayhan, Kîbar Suvarî, Devrîm Demîr û Ozcan Ateşî ameyî destbendkerdiş.
Sewbîna vervatoxa Hemsereka Pêroyî ya Partîya Herêmê Demokratîke (DBP) Salîha Aydenîze Sezen Mercan, Sezgin Bayram, Faris Turk, Ozan Serhat Bîngol, Mehmet Yalçin, Hemserekê Odeya Endezyarê Madenî yê Amedî Dogan Hatun, aktîvîstê Têgêrayîşê Cinîyanê Azade (TJA) Marîa Oztopuze ameyî destbendkerdiş.
Sereştişê qezaya Sêwregî ya Rihaye de endamê OHDyî Avûkat Metîn Ozbadem û sîyasetmedar Halîl Delen, Havva Bîldîk û Habat Mîmkara ameyî destbendkerdiş. Çarçeweya eynî dosyaye de qezayê Pirsûs û Wêranşarî yê Rihaye de sereştişê keyeyan ame viraştiş û ame zanayîş ke destbendkerdişî estî.
Baroyê Amedî reaksîyon mojna
Baroyê Amedî zî reaksîyon mijna destbendkerdişan û wina vat: “Çarçeweya tehqîqatê Serdozgerîya Komare ya Amedîû qerarê cigêrayîş û destbendkerdişî yê 3. Mehkemaya Cezaya Sulhî ya Amedî de ewro hetê serê sibayî de sereştişê keyeyê endamê baroyê ma, rojnameger û pawitoxê heqê merdiman virazîya. Destbendkerdiş û tepiştişî virazîyayî. Bi hawayêko kêfî nizdîyê heqanê esasî û azadîye benî. Sere de avûkat, pawitoxê heqê merdiman û rêxistinê meslekî, rêxistinê komelkî yê sîvîl yenê hedefgirewtiş, raştê tehdîtê cezakerdişî yenî. Yeno dîyîş ke tedbîrê pawitişî yê sey tepiştiş û destbendkerdişî vera pawitoxê heqanê merdiman de bi hawayêko zaf bêmana, bêfêde û xirab yeno şuxulnayîş. Sewbîna qerarê qedexeyê pêvînayîşê bi avûkatan reyde ameyo dayîş û seba dosyae zî qerarê nimitişî ameyo dayîş. Ganî derheqê sebebê destbendkerdişan bi lez bêro eşkerakerdiş. Ganî bi lez caardişê teberê huqûqî ke heqê azadî û asayîşî binpay kenî yê vera meslektaşanê ma, rojnameger û pawitoxê heqanê bîyarî û înan serbest vera bidî.”
150 kesî ameyî destbendkerdiş
Hektarê Serekê Baroyê Amedî Mehdî Ozdemîrî dîyar kerd ke badê fermanê Serdozgerê Komare tewr tay 150 kesî ameyî destbendkerdiş û nê malumatan pare kerd: “Operasyon hema zî dewam keno. destbendkerdiş hema zî dewam keno. Cigêrayîşê boruyê embazanê ma dewam keno. Heta nika zî derheqê sereştişan de tu malumat nêameyo dayîş. Sebebêk ke ma rê ameyo vatiş çinî yo. Operasyon vera komê meslekîyan de ameyo kerdiş. Mîyan de hunermend, sîyasetmedar, temsîlkarê rêxistinê komalo sivîl û avûkatî estî. Tehqîqatêko pêroyî yo.”
‘Ma do kişta endam, meslektaş û miwekîlanê xo de bî’
Komeleya Huqûqnasê Seba Azadîye (OHD) zî derheqê babete de serê hesabê xo yê dîjîtale de vat ke bajarê Amed, Êlih û Rihaye de rojnameger, sîyasetmedar û hemwelatijî ameyî destbendkerdiş û nê malumatan pare kerd: “Ewro hetê serê sibayî çarçeweya tehqîqato ke merkezê ci Amed bî de eştişê serê keyeyê yê xeylê endamanê ma virazîya. Cigêrayîşê komeleya ma dewam keno. Ma do vera nê operasyonê sîyasî de, vera wextêk winasî ke weçînayîşî rê tay mendo û eştî komeleya ma ser de, vera destbendkerdişê emdamanê ma de bêveng nêmanî. Çarçoweya eynî dosyaye de kişta endamanê ma de sewbîna Amed, Êlih û Rihaye de rojnameger, sîyasetmedar, hunermend û hemwelatijî ameyî destbendkerdiş.” AMED
