Hunermend û kurdîstanijê ke Ewropa de ciwîyenê, înan seba weçînayîşanê 14ê gulane bi rayîrê ajansê ma venga şar û merdimanê xo da ke wa raya xo bidê Partîya Çep a Keske.
Hozan Comerdî pare kerd ke seba ke zulmo ke vera şaran bi seserran o yeno kerdene, biqedo nê weçînayîşî firsend ê û vat: “Seba ke têkoşîn û kedê vera zulmî ser bikewê raya xo bidê Partîya Çep a Keske.”
Ma do nê sîstemî çin bikerê
Hunermendanê TEV-ÇANDî ra Fevzî Kiliçî vat: “No sîstemo faşîst û nîjadperest vera kurdan polîtîkayanê qirkerdiş û asîmîlasyonî ano ca. Ma do nê sîstemî çin bikerê. Bi taybetî ez venga şarê Erziromî dana ke wa raya xo bido Partîya Çep a Keske.”
AKPyî 21 serrî yo pêro çimeyê şarî çin kerdî
Îdareyê Federasyonanê Komeleyanê Demokratîkan ê Mereşî ra Talat Yeşîlkayayî vat: “Îqtîdarê AKPyî 21 serrî yo pêro çimeyê şarî çin kerdî. Seba haştîye, demokrasî û azadîye wa her kes raya xo bido Partîya Çep a Keske.”
Wa şar şorê sindoqan ser
Alî Tuncerî vat: “Ê merdimê ke xo rê vanê demokrat û vurîyayîşî wazenê wa şorê sindoqan ser û raya xo bidê Partîya Çep a Keske.”
Wa her kes raya xo bido Partîya Çep a Keske
Meryem Çagana ke Almanya de ciwîyena, waşt ke seba yewîye û edaletî wa her kes raya xo bido Partîya Çep a Keske.
Bi taybetî wa cinî û ciwanî wayîrê Partîya Çep a Keske vejîyê
Hemsereka verêne ya Partîya Herêmê Demokratîkî (DBP) ya Amedî Ruken Akça venga kurdîstanij û amedijan da û vat: “Wa kesê ke demokrasî, heqanê xo û azadîye wazenê raya xo bidê Partîya Çep a Keske. Bi taybetî wa cinî û ciwanî wayîrê Partîya Çep a Keske vejîyê.”
Ayten Surreye bi kirmanckî venga dêrsimijan da û waşt ke dêrsimijî wa raya xo bidê Partîya Çep a Keske. Esma Yildiz zî bala ante girîngîya nê weçînayîşan ser û waşt ke her kes şoro sindoqan ser, raya xo bido Partîya Çep a Keske.
