Çewlîg de rêxistinanê komelê sivîlî û sendîkayan 1ê Gulane bi eşkerayîyêke fîraz kerd. Temsîlkaranê Egitim-Senî, TMMOB, KESK, namzedanê Partîya Çep a Keske Cemîle Turhalli Balsak û Faruk Aris û Wekîlê HDPyî yê Amedî Hişyar Ozsoyî tewrê eşkerayîye bîyî. Eşkerayîye de dowîzî ameyî akerdene.
Hemvervatoxa KESKî Perîhan Demîre eşkerayîye wende. Eşkerayîye de bale ameye antene krîzan ser û ame vatene ke îqtîdaro nikayên bîyo belaya sereyê komelî.
Îqtîdarî ma hewceyê her çî kerdo
Demîre vat: ”Welat de bêkarîye zêdîyaye. Her roje cînayetê karî qewimîyenê. Fîyatî her roje benê vaye. Hînî çew nêeşkeno çîyêk bihêrîno. La meaşê karkeran nêno zêdekerdene. Tirkîya de krîzêko cidî est o. Bi rastî zî nika ma ameyê rewşêka winayêne îqtîdarî ma hewceyê her çî kerdo.”
Operasyon û destbendkerdişî yenê kerdene
Demîre bale ante operasyonanê destbendkerdiş û tepiştişan ser û nêrazîbîyayîşê xo mojna. Demîre vat: “Îxraçkerdiş, bêedaletî, tekperestî, milîtarîzm û îşkenceyê zîndanan yenê kerdene. Bi destê dezgehê muhakemekerdişî operasyon û destbendkerdişî yenê kerdene.” ÇEWLÎG
