Komîteya Şaran û Bawerîyan a KCKyî derheqê weçînitiş 14ê gulane yo ke do Vakurê Kurdîstanî û Tirkîya de bêro kerdene de cewab da persanê ANFyî. Roportajê komîte ra tay cayê muhîmî wina yê:
“Sere de ma nê vajê ke nê weçînitişî zaf muhîm ê. Bi nê vatişî ma nêvanê ke weçînitişî do çareyê her çîyî bê. La semedê heme nasname û bawerîyan ke Tirkîya de ciwiyenê nê weçînitişî muhîm ê. Dewleta tirke tim kurdan û elewîyan sey meseleya asayîşî gena dest û hêrişê înan kena. Ronahîşê komere ra nata sere de kurdî, elewîyî şarî binê zexte de yê. Nê 20 serranê peyênan de zextê vera kurdan, elewîyan, cinîyan, kedkaran zafêr bîyî. Hema hema her roje destbendkerdişî benê, zîndanan de tecrîd û îşkence merhaleya tewr berze de yê, problemê cinîyan xorîyêr benê. Şar rîyê problemanê ekonomîkî ra nêeşkeno nefes bîgêro. Nê 20 serran de şer ame giranêr kerdene û ehleq ame binpaykerdene.
Hukmatê faşîstî yê AKP-MHPyî rê nê qîm nêkerd Huda-Par bi nameyê bînî rêxistina Hîzbulllahî reyde îtîfaq kerd ke serranê 90yan de falîyetê kontra kerdêne. Pê nê wazenê şaran bitersnê. Xora Huda-Par yena zanayene. Bitaybetî kurdî na rêxistina terorî hole nas kenê. Na rêxistin partîya sîyasîye ya hîzbî kontra ya ke 90yan de hetê gladîoyê tirkî ra sey linga Kurdîstanî kewt dewre. Hêzê tarî û nimiteyî binê partîya sîyasîyî de kewnê weçînitişî. Xora hêzanê ke Tirkîya arde kişta kaşî nê yê. Coka nê weçînitiş muhîm ê. Têkoşînê têgêrayîşê azadîye, cinîyan, ciwanan, kedkeran û derûdorê demokrasîyî maneyê rejîmê faşîstî şiknayo. Weçînitiş de pê darbeya peyêne eşkeno bêro rijnayene. Semedê nê rolê Îtîfaqê Kede û Azadîye muhîm o. No îqtîdaro qirker 20 serrî yo dişmenîya komelî keno. Gerek inkey derûdorê Partîya Çep a Keske de şarî bêrê têhet û wayîrê erjanê xo bivejîyê û nê îqtîdarî bişawê.
Îqtîdarê faşîstî felaketê komelkî zî goreyê menfeatê xo girewtî dest û goreyê hesabanê xo têgêrayî. Bûnlerz de mudaxaleyê kurdan û elewîyan nêkerd. Şar bi paştdayîşî wayîrê yewbînî vejîya. No semedê şaranê dinya û komelê ma bi dersêke. Şarî dî ke eşkeno bi îradeyê xo têbigêro, hêzê xo bişuxulno. Îqtîdarî paştdayîş û yewbîyayîşê şarî xo rê sey tehlukeyî dî û cade dest na depoyanê hetkarî ser û mudaxale kerd. Şarî dejê pîlî antê, merdimê ci ke eşkayêne bêrê xelisyayêne verê çimanê înan de binê xirban de merdî. Nê hetî ra şaro ke herêmanê bûnlerzî de ciwîyeno rolê ci gird o. Îqtîdarê faşîtê ke şarê herême mergî rê caverda gerek tira qesas bêro girewtene.
Ma sey kurdan û şaranê Tirkîya kewtî yew proses ke averberdişê muhîmî do biqewimîyê. Ma reyna wazenê vajê ke ma bertengê bedilnayîşî de yê. Verê ma de semedê îqtîdarê qirkerî yê AKP-MHPyî ra hesabpersayîşî firsetêk est o. Gerek heme şarê Tirkîya nê firsetî bişuxulnê û qîtîdarê faşîstî ra hesab bipersê. Sere de kurdî, heme şarê Tirkîya, grûbê bawerîyan, cinîyî, kedkarî seba ke paradîgmaya netewa demokratîke bêro ciwîyayene gerek têkoşîn bikerê. Şarî gerek zafêr wayîrê Rayber Apoyî bivejîyê. Seba ke 15ê gulane de Tirkîyaya demokratîke de bêro ciwîyayene gerek her kes derûdorê Partîya Çep a Keske de bêro têhet.” BEHDÎNAN
