AKP’ê ji 21 salan ve li ser desthilata Tirkiyeyê ye û hilbijartinên 14’ê Gulanê wek mijara hebûnê ji bo xwe dibîne. Lewma jî zextê li sûriyeyiyên ku nasnameya Tirkiyeyê standine, dike da ku dengê xwe bidin wê yan jî nasnameyê ji wan bistîne û wan vegerîne Sûriyeyê.
Ji rûspiyên eşîra El Welda ya Reqayê Yûsif El Esed hişyarî li ser encamên dengdayîna ji bo AKP’ê û serokê wê Erdogan da û got divê sûriyeyiyên ku nasnameya tirkî standiye, dengê xwe nedin AKP’ê ku sûriyeyî qetil kirin û ew koçber kirin.
El Esed bang li eşîrên ereb ên li Tirkiyeyê kir ku dengê xwe nedin AKP’ê û got AKP sedema herî mezin a wêrankirin û xirabkirina Sûriyeyê ye.
El Esed di berdewama axaftina xwe de got: “AKP îdia dike ku partiya edalet û gişkirinê ye, lê mixabin partiya zilm û tarîtiyê ye. AKP’ê xêr û bêra Sûriyeyê talan kir û demografiya wê guhert. Ev partî destwerdanê li Sûriyeyê tenê nake, di heman demê de destwerdanê li kar û barên tevahî welatên ereban ên derdorê dike.”
El Esed bi bîr xist ku AKP’ê di hilbijartinên berê de nasnameyên tirkî dan gelek sûriyeyiyan da ku dengê wan qezenc bike û diyar kir ku îstîxbarata tirk gef li her kesên ku dengê xwe nedin vê partiyê, dixwar û nasname ji wan distand.
Yûsif Esed îşaret pê kir ku desthilata tirk niha jî heman rêbazê li dijî penaberên Sûriyeyê bi kar tîne û nasnameya tirkî dide wan da ku di hilbijartinan de hejmareke mezin a dengan qezenc bike.
Rûspiyê eşîra El Welda Yûsif El Esed bang li eşîrên ereb ên li Tirkiyeyê kir ku dengê xwe bidin kesên hêja yên nûnertiya wan bikin û got: “Tirk bi xwe jî li welatê xwe ji aliyê AKP’ê ve êş û azaran dikişînin û di rewşên zehmet de dijîn. Ew jî dixwazin ji serdestiya Erdoganê faşîst xilas bibin.”
