Komîteya Têkilîyanê Teberî ya KCKyî Azîme Arsuna ke Meydanê Teyarayan ê Hewlêrî de amebî destbendkerdene ser o eşkerayîyêke daye. Eşkerayîye wina ya:
”Ma prosesê rijîyayîşê rejîmê Erdoganî ra derbaz benê. Rejîmê AKP-MHPyî nê prosesî de zî vera kurdan, Rayber Apoyî û gerîlayan bi destekê hemkar û xayînan hêrişanê xo rê bêmabên dewam keno.
Embaza ma Azîme Arsuna ke nêweşêka giran a û têkoşînê azadîya şarê ma de cagirewtêne Meydanê Teyarayan ê Hewlêrî de ameya destbendkerdene. Embaze Azîmeya ke seba tedawî şîyê teberê welatî ameya destbendkerdene. Nêzanîyeno ke a hetê PDK-Parastinî ra ameya berdene kamcayî. Tay agahîyî vanê ke a hetê PDK-Parastinî ra teslîmê MÎTê dewleta tirke ameya kerdene. Ma hema derheqê na agahîye de çîyo raşt nêvist destî. La qetî yo ke embaze Azîme bê qeyîdkerdişî hetê Parastinî ra ameya remnayene. Coka beno ke embaza ma Azîmeya ke nêweşa qelbî ya giran a, teslîmê dewleta tirke bêra kerdene.
Şermêka pîl a ke PDKyî cinîyêka kurde ya şorişgêre bi nê hawayî remnaya û seba têkilîyanê xo yê gemarinan a bi dewleta tirke şuxilneno. Aqîbetê embaze Azîme ra PDK û Parastin mesuldar ê.
Nê esasî ser o ma venga rayaumûmîya Kurdîstanî û rêxistinanê cinîyan danê ke seba ke aqîbetê embaze Azîme bizanê têbigêrê, meverdê ke PDK seba ke Erdogan kampanyaya weçînayîşî de bişuxilno embaze Azîme teslîmê dewleta tirke bikero.” BEHDÎNAN
