Hemvervatoxa Kongreya Demokratîke ya Şaran (HDK) Esengul Demîre seba Partîya Çep a Keske taxe bi taxe, kuçe bi kuçe xebatanê weçînayîşî kena. Demîre derheqê xebatan de ANFyî rê qisey kerd.
Demîre ard ziwan ke sey HDKyî ê bi xurtî paştî danê karanê weçînayîşî yê Partîya Çep a Keske û vat: “Stenbolî zî tede pêro herêmanê Tirkîya de, cayanê ma yê rêxistinkerdeyan de embazê ma vila bîyê. Ma bi aktîfî waran de yê. Partîya Çep a Keske seba weçînitoxan nameyêko newe yo la vera gefê qefilnayîşê HDPyî Partîya Çep a Keske kewta dewre. Weçînitoxê na partîye goreyê 2018î û rixmê pêro hêrişan zî zêdîyayê. Coka xeyal nîyo ke Partîya Çep a Keske 100 wekîlan bişawa Meclîsî. No armanc mumkîn o. Ma pê bawer ê ke Stenbolî ra zî Partîya Çep a Keske do 100 wekîlan bişawa Meclîsî.
Ma vera xîretanê hêrişî amade yê
Demîre bale ante ser ke îqtîdarî xîret kerd ke atmosferê mabênê 7ê hezîrane û 1ê teşrîna peyêne reyna awan bikero la nêeşka. Demîre vat: “Vera standan, bînayan û buroyanê weçînayîşî hêrişî qewimîyayî. Îqtîdarî kerd ke çimê komelî bitersno la narey nêeşka tesîrê komelî bikero. Mabênê weçînayîşanê 7ê hezîrane û 1ê teşrîna peyêne de qirkerdişê pîlî qewimîyayî. Sey komelo ke no çi ameyo sereyê ci, ma vera xîretanê hêrişî amade yê û hişyar ê.” STENBOL
