Qezaya Pirsûsî ya Riha de14ê hazîrana 2018î de pawitox û merdimanê Parlamenterê HDPyî Îbrahîm Halîl Yildizo ke binê pawitişê dewlete de yo, vera keyeyê Şenyaşarî qirkerdişêk kerd. Qirkerdiş de babî û di birayê Ferît Şenyaşarî ameyî qetilkerdene, birayêkê ci ame tepiştene û Ferît Şenyaşar zî birîndar bi. Qewimîyayîş ra dima Emîne Şenyaşar û lajê aye Ferît Şenyaşarî 9ê Adara 2021î de vernîya Edlîyeya Rihaye de dest bi çalakîya Nobeta Edaletî kerdbî û di serrî yo ke çalakîya înan dewam kena. Emîne Şenyaşare vera nêweşîyanê xo fek Nobera Edaletî ra vera nêdana. Lajê aye Ferît Şenyaşaro ke Partîya Çep a Keske ra şî meclîsî do waştişê edaletî Anqara de dewam bikero û Emîne Şenyaşare zî do verê edlîyeya Rihaye de dewam bikera.
Emîneye derheqê waştişê edalet û netîceyê weçînayîşî de qisey kerd.
‘Dewleta ke huqûqê aye çin o’
Emîne Şenyaşare da zanayîş ke lajê aye Fadil Şenyaşarî zîndan de hucreya yew kesîye de yeno tepiştiş û aye û Ferît bade qetilkerdişî dest bi Nobeta Edaletî kerd. Emîneye wina vat: “Ma serd û seqem, germe hamnanî de têkoşînê xo dewam kenî. Eke wijdanê înan bibayêne do lajê mi serbest biverdayêne. La ne wijdan, ne huqûq û ne zî dewlete bi xo esta. Dewlete eke bibayêne do kesê ke nê qetlîyamî pê ardî bitepiştêne. Nê zilmî rê êdî bes o. Wa lajê mi serbest bêro verdayîş. Ez zî şêra keyeyê xo, kişta torinanê xo.”
‘Do edalet bêro’
Emîne peynîya qiseykerdişê xo de dîyar kerd ke do çalakîya xo dewam bikera û peynîya aye merg biba zî do verê edlîye de bibo û wina qedênaye: “Ez wazena edalet pê bêro, welatê ma tay bo zî helmê xo bigîro. Lajê mi Ferît Partîya Çep a Keske ra ame weçînayîş û nika Anqara de yo. O zî do Anqara de têkoşîn dewam bikero. Ma do têkoşînê edeletî bidê. Bi di serrî yo ez têkoşîn kena. La xeylêk cipersayîş mi rê ameyî akerdiş. Ez bawer kena ke do edelet bêro, No hukmat bivuryo. Ez tenê seba xo nê seba her kesî edalet wazena. Heta lajê mi vera nêdê ez tîya ya. Ez o xo ver bidî û serbikewî.” RIHA
