Hunermendanê kurdan Hemîd Urmîye û Hozan Kawayî bale ante muhîmîya weçînitişê serekkomarîye ser û vat ê bitaybetî ciwanan ra pawenê e hem şirê sindoqan ser û hem zî serkêşîya nê bikerê.
Hunermend Hemîd Urmîye vat: “Vera kurdan zilm û qirkerdişî yenê kerdene. Sere de Rayberê Şarê Kurdî Abdullah Ocalan bi hezaran kurdî zîndanan de yenê tepiştene. Gerek şarê kurdî destê xo bidê wijdanê xo ser wina şiro sindoqan ser. Îqtîdarê AKP-MHPyî tim hêrişê kurdan keno. Hêrişê koyanê azadan, Mexmûr, Şingal û Rojawanî keno. Rojawano ke bi gonîya şehîdan ameyo ronayene keno ke çîn bikero. Kam vano se, goş pa mekwê, raya xo bişuxulne. Mevajê pê raya mi se beno, bi rayêke rejîmo faşîst eşkeno bêro rijnayene. Gerek her kes şiro sindoqan ser û semedê rijnayîşê îqtîdarê Erdoganî raya xo bişuxulno. Îqtîdaro ke 14ê gulane de leqa, wa 28ê gulane de bêro rijnayene.”
Ganî her kes şiro sindoqan ser
Hunermendanê kurdan ra Hozan Kawayî zî semedê raydayîşî veng da û vat: “Seba ke her kes bi nasname û fikrê xo azad biciwîyo û welat tengayî ra bivejîyo ganî heme kesê ke aştî û demokrasîye wazenê şirê sindoqan ser.”
