Artêşa Iraqî 20ê gulane ra nata kena ke Mexmûr pê têlan û kuleyan bigêra binê ablûqa. Her ke artêşa Iraqî xendekan akena şar xefilneno. Şaro ke xeyman de nobete gêno ano ziwan ke qetî ablûqa qebul nêkero.
Dayîke Emîne Şirnexî pare kerd ke ê raştê zulmê dewleta tirke û hukmatê Bexdadî yenê û vat: “Hêverî seba ke ma bimirê vera ma ambargo ame kerdene. La ma nêmerdî! Çew nêeşkeno hêzê ma bişikno. Ma do heta peynî xo ver bidê. Wa bêrê, ma bikişê. Naye ra wetêr çîk est o?”
Dayîke Emîne Pîranî vat: “Çira înan ma vera DAIŞî nêpawitî? Nika yenê vanê ‘Ma şima pawenê.’ Ma ney qebul nêkenê. Na ablûqa netîceya tedayanê Erdoganî ya. Na ablûqa zulm o. Zerarê ma çewî rê çin o. Ma ruhê merdimatîye pawenê. Ma haştî û wayûbiratîye rê tim amade yê la do qetî na ablûqa qebul nêkerê.”
Wa pêro kurdîstanijî paştî bidê xoverdayîşê ma
Mamosta Hewar Gabarîyî da zanayene ke ablûqa bi fermanê Erdoganî yena caardene û vat: “Ablûqa esaret a. Ê wazenê ke ma esîr bikerê. La ma do naye qebul nêkerê. Wa pêro kurdîstanijî paştî bidê xoverdayîşê ma, verê sersefîrîyanê Iraqî de çalakîye bikerê. Eke ma dest bidê destî eşkenê na ablûqa bişiknê.” MEXMÛR
