Rayberê Şarê Kurdî Abdullah Ocalan 1999 ra nata Zîndanê Îmraliyî de binê tecrîdî de tepişîyeno. Di serrî yo Ocalanî ra qet yew xebere nêna girewtene û cewab nêdîyeno muracatê seba pêvînayîşan. Nê atengkerdişî binê bahaneya ‘cezaya dîsîplînî’ de yenê kerdene la nê bahaneyî hewte û mengan ra dima vajîyenê avûkatan.
Goreyê xebera Ajansê Mezopotamya avûkatan 23yê kanûne de vera qedexeyê pêvînayîşî muracata Hakîmîya Înfazî ya Bursa kerdo la muracat bi bahaneya qedexeyî 3yê çeleyê 2023yî de ame redkerdene û cezaya dîsîplînî est a. Seba ke na bire bêra wedaritene 10ê çeleyî de Mehkemeya Cezaya Girane ya Bursa rê îtîraz kerd la mehkeme heman roje muracat red kerd.
Erdlerzê 6ê Sibate ra dima avûkatan û keyeyê Ocalanî reyna muracatê pêvînayîşî kerd. Nê muracatî ra dima ame parekerdene ke Rayberê Şarê Kurdî Ocalanî û tepişteyanê bînan ê Îmraliyî Omer Hayrî Konar, Hamîlî Yildirim û Veysî Aktaşî rê 21ê kanûna 2021î de seba 3 mengan qedexeyê pêvînayîşî dîyayo û na bire 10ê çeleyê 2023yî de qetî bîyo.
Avûkatan rixmê ney zî hewte de di reyî seba pêvînayîşê avûkatan û reyêke zî seba pêvînayîşê keyeyî muracat kerd.
Dima eşkera bi ke 15ê adare de reyna qedexeyê pêvînayîşî ame dayene û 30ê adare de bire qetî bîya. Bira qedexeyî 14ê nîsane de ameye berdene bi Mehkemeya Cezaya Girane ya Bursa. La îtîraz 30ê nîsane de ame redkerdene.
Avûkatan 27ê nîsana 2023yî de reyna Hakîmîya Înfazî ya Bursa rê muracat kerd la cewab nêdîya muracatî. Herinda aye de Mehkemeya Cezaya Girane ya Bursa avûkatan rê bire teblîx kerde.
Teblîx de ame vatene ke Abdullah Ocalanî rê qedexeyê pêvînayîşî yê 6 mengan ameyo dayene.
Avûkatî vera qedexeyî Mehkemeya Qanûnê Bingeyî (AYM) rê muracat kerd.
