Weçînayîşê 14ê Gulane de, waştişê kurdan ay yewin; peynîya îqtîdarê Erdoganê bîyarê. La sey waştişê kurdan nêbi. Tifaqa Komarî û terafdaranê înan bi dek û dilaban, bi zafane rayî girewtê û parlemento de bi zafane wekîlî raykedê Meclîs. La çîyo ke nişna xo dest fîynê, Serekkomarî bî. Na ra newe ra yewna weçînayîş yanî tûra dîyine de R. Tayyîp Erdogan bi Serekkomar. Ez wazena ke no weçînayîşî ser o fikrê xo bîyara ziwan.
1-No weçînayîş de Tifaqa Serekkomarî, vernîya HDP de, tayê damî/dafikî ronaybê. Weçînayîş ra ver/vîyar padayîşê HDP dekerd rojewê Tirkîya. Waştnê ke nizdîyê weçînayîşî de HDP padê û wekîlê kurdan nêdekewê parlemento. Vera nê planê qirêjinî; ne partîyanê çepan ra, ne zî partîyanê Tifaqa Milete ra yew tepkîyo berz vejîya. Qet nêbo Partîya CHP ra ganî yew vengo berz bivejîyaynî. La çi heyf ke Partîya CHP zî zaf yew tepkî nênawit. Kurdî mecbur mende, yewna partî de, yanî Partîya Çepe ya Keske (YSP) de bidekewê weçînayîş. Mezg û zerrîya kurdan û şaranê binan de HDP ca girewt bi. Tabî ewta de zî rêxistinbîyayîş, sinasnayîş û qebulkedişê na parti rê yew wext hewce kerdnî. No wext zî bes nêbi.
2- Partîya HDP (YSP); seba namzetan; şarî ra nêpersîyayê, fikrê şarî nêgirewto û namzetî nawitê.
3-Yewna het ra, tûra yewine de, Partîya HDP (YSP); ganî weçînayîşê Serekomarî de, bi namzedê xo bikewtnî weçînayîş. Ay wext weçînayoxî, hina zaf motîve bîynê û hina zaf wekîl vejîyaynê. Yewna het ra seba tûra dîyine zî destê partî hina xurt bîynî.
4- Nê serranê peynîyan de, tayê aktîvîst, serekê partî, encümen û şaredarî partî ra durî kewtê. Semedo ke nê merdimi zî îqna bibîynê û ê zî bidekewtnê xebata weçînayîşî, yew diyalog nêvirazîyayo. Nê merdimî, ya teberê xebata weçînayîşî de mendê, yan zî bi zerrîya safî nêxebitîyayê. Na zî yew raşteya ma ya, wexto ke ma, tam organize nêbê, mûral û motivasyonê ma çin bo, ma yew netîceya başe nêgênê.
5- Şarê ma xizan o. No mewsîm de zafê ciwanan, seba xebate şîybê tebere welatî. Ma zanê ke welatê ma de, ciwanî ke şonê Rojawanê Tirkîya de xebitînê, zafê înan weçînayoxê HDP (YSP) yî. Ewta de zî yew dezawantajê ma esto.
6-HDP (YSP); semedo ke Hem YSP rê, Hem zî Kemal Kiliçdarî rê ray waştê, tayê kurdan, ray nêdayê YSP, dayê CHP.
7- HDP seba tifaqe Rojawanê Tirkîya; TÎP û tay partîyan reyde yew tifaqe awan kerde. Weçînayîşê 14ê Gulane Partîya TÎPe xoser dekewte weçînayîş. No semed ra YSP tay wekîlê xo vînî kedrdê.
8-Hem Weçînayîşê 14ê gulane de, hem zî weçînayîşê 28ê Gulane de Tifaqa Komarî û terafdarê ya, bi temamê îmkananê dewlete û destekê medya, Erdoganî rê xebitîyayê. Peynî de netîceya xeyrê resmî; Erdoganî 52.18 rayî, Kemal Kiliçdaroglûyî 47.82 rayî girewtê kaldı. Goreyê na netîca, Recep Tayyîp Erdogan newe ra bi serekkomar. La semedo ke polîtîkaya înkarî de israr keno, vera Serekkomar Recep Tayyîp Erdoganî, kurdan; bi rayanê xo 14 şaristanan de Kemal Kiliçdaroglu tercih kerd.
Serra 2015î de HDP sera 13 rayî girewtê û 80 parlementer raykerdê Meclîs. AKP na netîce hezim nêkerde. Yew prosesê şerî da dest pêkerdiş. No prosesê şerî de rayna yew weçînayîş bi. HDP sera 11 ray girewtê 59 wekîlî raykerdê Meclîs. Weçînayîşê serra 2018î de nizdîyê se ra 12 ray girewtê û 67 parlementer raykerdê Meclîs. No weçînayîşo peynî de vatnê “Ma 100 heban ra vêşêr wekîl vejenê.” La 62 wekîlî raykerdê Meclîs. HDP hedefêko pîl da vernîya xo, la nêresayê hedefê xo.
Merdimê Tifaqa Serekkomarî vanê ke; ma demokrat î, ma heq huqûqî esas gênê. La bellî yo ke semedo ke kurdî, no welat de wayîrê yew îradeyî nêbê, çi destê înan ra yeno kenê. Demokratîya/demokrateya înan, temamen qalan de manena. Bi afîşan û videoyanê sexteyan vera Kiliçdarogluy û YSP propagandaya zurayine û qirêjine kerde. Tewr peynî de Serekkomar Erdogan, seba qalkerdişî, vejîya balkonî ser. No qalkerdiş de, rayna Sellahattin Demirtaş, bi qetilkerdişê 51 tenan sucdar kerd. Heme kes zano ke, Sellahattin Demîrtaş bêsuc o. Wexto ke Serekkomar sucdar keno qelebaliğî ra vengê; “Seloya îdam” vejîno. Aseno ke Serekkomar Erdogan û nê nîjadperestê ey; yew mîlîm nêbedilîyayê, polîtîkaya îmha û înkarî de israr kenê.
Hewce keno ke HDP (YSP) şarê reyde; hem na politikaya înkarî, hem zî rewşa nê weçînayîşî bierjno û goreyê na netîceya erjnayîşî, xo newe ra organîze bilko/bikero.
