Hazîne Alçiye Hezexê Şirnexî ra ya û tepişteya PKKyî ya. Hazîneye 1999î de wexto ke hema 25 serrî bî hetê Ermenîstan ra teslîmê Tirkîya ameye kerdiş. Goreyê dayeyanê ÎHDyî Hazîneye tepişteyê nêweşî yê giranan ra yew a. Hezîneya ke 50 serrî ya prosese tepiştişê xo de bi xeylê binpaykerdişan reyde rî bi rî menda.
Hazîneye zîndanê Cinîyan ê Bakirkoyî ra surgunê zîndanê Gebze ameye kerdiş. Hazîneya ke pê çekî birîndar bibî û çaqeyê ade de xisar virazîyabî çonkê aye ra heta kulîmekê aye parçe bîbî û platin tede ame bi ca kerdiş. Coka ra do her tim bi platînî bimana. Hazîneye nizdîyê 18 serrî yo ke bi platînî hewl dana payan ser de bimana. Aşma Teşrîna Verêne ya 2009î de Nêweşxaneyê Cigêrayîşî yê Samatyaye de protezê aye ame bedilnayîş.
Keyeyê Hazîneya ke hewteyo verêne de şî pêvînayîşê aye rewşa peynî ya kênaya xo JINNEWSî rê qalî kerd.
Ganî bi lez amelîyat biba
Keyeyê aye dîyar kerd ke Hazîne aşma Nîsane de bê bahane surgunê zîndanê Cinîyan ê Gebze ameya kerdiş û verê ke bêra surgunkerdiş zî ATKyî rapor amade kerdo. Keyeyê aye wina vat: “Rapor mîyan de yeno vatiş ke Hazîne şertê zîndanî de eşkena bimana, ganî cayêk bi asansor de ca biba û nêeşkena derenceyan ra bianca. Reyna rapor de yeno vatiş ke ganî bi lez bêra amelîyatkeriş. La Dadgerîya Bakirkoyî û îdareyê zîndanî rapor girewtî û rapor nika verê înan de yo.”
Seba ke nivîn çinî yo mutbex de rakewena!
Keye eşkera kerd ke wexto ke Hazîne surgun kerdî, nivîno ke seba nêweşîya aye ci rê ameybî girewtiş nêberdî Gebze û wina dwam kerd: “Hazîneye vat ke nivîn çinî yo û raşteyê hempar de rakewena. Di hewte verê cû bi wesîleya 19ê Gulane roja sêşeme ma pêvînayîşê akerde pê ard. Nivîno ke ma taybet aye rê girewtbî nêberdî ewja. Ekse ci zî pere waştî. Ma 750 lîre pereyê kargo şirawit. La hema zî nêerşawîyayo. Coka ra nika mutbex de rakewena.”
5 serrî yo plantîn nîno newekerdiş
Keye wina dewam kerd: “Werdê zîndanî nînê werdiş. Hazineye vat ke kantîn ra penîr û zeytun herînenê. Dadgeh waştişê amelîyatî red kerd. Pandemîyî de doktor nêewnîyayêne rîyê înan. Rewşa Hazîneye baş nîya. Vîdeyê platînê aye sist bîyî û 5 serrî yo ke ganî bêrî newekerdiş. Bi no hawa têkoşînê cuye dana. Waştişê Hazîneye no yo ke bi lez bêra dermankerdiş. Eke huqûq û demokrasî bibayêne do Hazîne serbest biameyêne verdayîş. La seba ke Kurd a meşru kenî.”
Raporê ‘eşkena zîndan de bimana’
Aşma Teşrîna Verêne ya 2009î de Nêweşxaneyê Cigêrayîşî yê Samatyaye de protezê aye ame bedilnayîş. Hazîneye dîyar kena ke no protez maneno îskeleyê înşatî û her çar hetê protezî de bizmar estî. Hazîneye ganî timî bêra kontrolkerdiş. La çi heyfo ke her tim yena astengkerdiş. Sewbîna Dezgehê Tipê Edlî zî seba Hazîneye raporê eşkena tepişte bimana da.
Pê gopal payan ser de manena
Hazîneye 10ê Çeleyê 2022yî de mesajêk bi rayîrê avûkatanê xo şirawit û wina vat: “Kalîteya protezî hende xirabo ke tede bizmar, têl û her çî esto. Çi heyfo ke şertê dermnakerdişê mi zî nêbeno. Nêweşxane ke mi amelîyat kerd, vatî ke ma to nêeşkenê amelîyat bikerî ti do mase ser de bimana. Coka ra ez nika pê golap gêrena. Weva raporê înan raporê ‘eşkena zîndan de bimana’ dayî mi.”
Cuya ci zehmet kena
Alçiye prosesê pandemî de seba do 14 rojan tenê hucrê de bimano nêşî nêweşxane. Alçiye dîyar kerdibi ke seba oda de tuvaletê alaturka esto xeylêk probleman ciwîyena.
Cezaya hucreyî!
Keyeyê Hazîneye aşma Çele de şîbî pêvînayîş û Hazîneye mesajêke ajansê ma rê şirawit. Keyeyî dîyar kerd ke Hazîne ne yena dermankerdiş ne zî benê nêweşxane. Keyeyî wina vat: “Dejbirnayîşêk zî nêdanê. Dejê aye estê. Bi gopal rayîr ra şina. Pêwa her çî têkoşînê cuye dana. Seba Hazîne vata, ‘bi weşîye mi reyde eleqedar mebê’ hewteyêke cezaya hucreyî dayî.”
Têkoşînê aye dewam keno
Keyeyî vat, ganî platînê Hazîneye bivuryo û pêwa pêro çî Hazîne bi moralêk pîl têkoşîn kena û seba Hazîne sewqê Nêweşxanê Cigêrayîşî yê Hasekî bêro kerdiş waştişname dadgehe rê nuştê û wina vat: “Seba Hazîne bêra veradayîş û dermankerdişê aye bêro kerdiş ma waştişname nuşt. La qebûl nêkerdî. Werdê zîndanan xeylêk xirab ê. Baş wey nêbenê. Porsîyonê înan qij ê. Kantîn ra penîr û zeytunan gênê. Ma Hazîne rê terlêkê ortopedîk girewtî la ê zî qebûl nêkerdî. Her çî kantîn ra gênê.”
Hazîne bi hemkarîya keyeyî waştişê xo neql kerd û û dîyar kerd ke ganî bêra dermankerdiş û no tecrîd peynî bibo. STENBOL
