Serokê Konseya Ewropayê Charles Michel roja înê ji bo civîna Yekîtiya Ewropayê û Asyaya Navîn çû Kirgizistanê. Ji ber ku Rûsya nîşaneyên qelsbûnê nîşan dide, hêzên mezin berê xwe dan vê herêmê.
Tê payîn ku serokên Kazakistan, Kirgizistan, Ozbekistan û Tacîkistanê û heyeteke Tirkmenîstanê jî wê beşdarî civînê bibin.
Civîn wê li bajarê Çolpon-Atayê were kirin. Du hefte berê ev pênc welatên Sovyeta berê û Çîn jî civiyabûn. Çîn jî ev demeke dirêj e hewl dide li vê herêma ku di bin bandora Rûsan de ye, şopekê bihêle.
Lê belê bi şerê Ûkraynayê jî di têkiliya YE û welatên Asyaya Navîn pêleke nû derket holê. Welatên Asyaya Navîn bi vê wesîleyê şirîkatiyên xwe dewlemend kirin.
Yekîtîya Ewrupa di navbera salên 2014 û 2020’an de bi 1,1 milyar dolarî bexş dabû. Di şirîkatiya veberhênanê de jî YE ji sedî 42 para wê heye. Para DYA ji sedî 14,2 e, ya Rûsyayê ji sedî 6 û ya Çînê jî ji sedî 3,7 e.
Ji ber ku hin welat li gorî zextên li ser Rûsyayê tevnegeriyabûn, Yekîtiya Ewropayê gef li van welatan xwaribû. Komarên Asyaya Navîn jî di nav van welatan de ne.
Her çend welatên Asyaya Navîn niyeta xwe ya ji bo meşandina siyaseteke derve ya pirfaktorî nîşan dane jî, ev welat di warê leşkerî, aborî û çandî de bi giranî girêdayî Rûsyayê ne. Lê Çîn ji bo fînansekirina Rêyên Hevrîşîm hewl dide vê rola Rûsyayê ji destê wê bistîne.
