Kantonanê Zurich, St. Gallen û Luzernî yê Swîsre ra tay heyetî seba teqîbkerdişê weçînayîşanê 14-28ê gulane şîbî Tirkîya. Heyetî Amed, Anqara de Ajansê Mezopotamya û Jinnewsî, Wekîlo verên ê Partîya Demokratîke ya Şaran (HDP) Îdrîs Baluken û Hemsereka Komeleya Heqanê Merdiman (ÎHD) Eren Keskîne zîyaret kerdbî.
Heyetî St. Gallen de çimdarîyê xo ser o panelêk viraşt. Panel de avûkate Pinare Reşîtoglu, rojnamegere Corinne Riedener, wekîle Fransizka Ryser, avûkat Florian Wickî qisey kerd.
Seba ke hem rojnameger û hem zî cinîyê kurd ê raştê hêrişan yenê
Corinne Rieder qala zîyaretê Ajansê Mezopotamya û Jinnewsî kerde û vat: ”Zîyarte de muxabîra Jinnewsî Gulşen Koçuke ma rê vat seba ke ê hem rojnameger ê hem zî cinîyê kurd ê raştê hêrişan yenê.”
Avûkatî yenê muhakemekerdene
Avûkate Pinar Reşîtoglu zî da zanayene ke Tirkîya de xeylêk avûkatî ‘endamîya rêxistine’ ra yenê muhakemekerdene. Florian Wickî zî ard ziwan ke Tirkîya de cuyê avûkatan ser o rîsk est o û vat: “Avûkat Tahîr Elçîyî seba ke vatbi ‘PKK rêxistina terorî nîyo’ ame qetilkerdene.”
Tirkîya de polîtîka yew hobî nîya; têkoşîn û xoverdayîş o
Wekîla Partîya Çep a Keske Fransizka Ryser zî qala zîyaretanê xo yê bi wekîlanê HDPyî kerde û vat: “Mi nê zîyaretan de fam kerd ke Tirkîya de polîtîka yew hobî nîya; têkoşîn û xoverdayîş o.” ST. GALLEN
