Badê weçînayîşê pêroyî û serekkomarîye Recep Tayyîp Erdogan reyna sey serekkomar ame weçînayîş. Sera 50ê welatî bedilnayîş waşt û yew heto ke bedilnayîş waşt zî ciwanî bî. Ciwanê ke xo Tirkîya de asan hîs nêkenê bado ke Recep Tayyîp Erdogan reyna ame weçînayîş welat terk kenê. Kişta ci de bado ke Huda Par û Partîya Refahî kewtî meclîs cinî derheqê cuye û heqê cuye de kewtî mîyanê fikaran.
Parlamentera Partîya Çep a Keske ya Edene Tulay Hatîmogullariye derheqê babete de ercnayîş kerd.
Hatîmogullariye dîyar kerd ke hem sey HDPyî û hem zî sey Partîya Çep a Keske netîceyê weçînayîşan ercnayî û netîce sey serkewtişî nêdîyî, kêmanîyê cidîyan dîyî, no zî kombîyayîşê Heyetê Îdare yê Merkezî (MYK) de qisey kerdî û wina vat: “Ma do kombîyayîşanê ke pê bîyarî de zî ercnayîşan bikerê. Tabî heqê şarê ma yê rexnekerdişî esto. Seba ma nê rexneyî xeylê muhîm ê. Ma partîyêk şaran ê. Ma rexneyan rê akerde yê. Ma tena seba rayan bi şarê xo reyde têkilî awan nêkenê. Ma têkoşînê komel û şarî danê. Qet şik çin o ke ma do nê rexneyan verê çiman ra derbaz bikerê û newe ra şekil bidê.”
‘Mezgê tewr baş mecbur manenê koç bikerê’
Hatîmogullariye ard ziwan ke bado ke serekkomarê AKPyî qezenc kerd, qismêk ke hetê Tirkîya de ciwîyenê koç kenê û wina vat: “Yew sebebê koçkerdişî krîzê ekonomî yo. Tirkîya de koçkerdişêk cidî esto. AKP rejîmê yew camêrdî tesis keno, bi taybetî badê hewldayîşê 15ê Temmuze rayîrberîyêk teng ke nameyê ci nêameyo ronayîş ame awankerdiş. Hende selahîyetî deste serekkomarî de estê, bi KHKyan akademîsyenê unîversîteyan ameyî îxrackerdiş. Tirkîya dinya de mîyanê 500 unîversîteyan de ca gêna la xeylê tepîya menda. Tîya de perwerde û akademî qedênayî. Perwerde têk şîyo. Kerdî texteyê cerebnayîşî. Wendekaran aciz kerdî. Wendekarî nêzanê ke wanenê ya nêwanenê. Kewenê îmtîhanan nêkewenê fehm nêkenê. Wendekarê tipî heme şinê qursê Almanî. Almanya bere xo înan rê akena. Şinê Almanya. No zî yeno no mana ke 10 serrî ra dima ma do doktoran nêvînê ke ma derman bikerê.”
Betalîyêk cidî esto
Hatîmogullariye bale ant betalî, feqîrî, bê asayîşê Tirkîya ser û vat ke ciwanî coka ra nêwazenê welat de biciwîyê û nê çîyan vat: “Hêzê kede ke lazimîya Tirkîya bi ci esta şino teberê welatî. Tirkîya de nîsbetê welidnayîşî berz o. Wexto ke merdim bi welatanê rojawanî reyde ano vera yewbînan hêze gird yê kede welat de esto. Welat de problemê hêzê kede çin o. Ewropa de nîsbetê welidnayîşî kêm o. Coka ra lazimî bi hêzê kede vîneno. Vera koçberîya mezgî de Tirkîya de hêzê kede zî bi hawayêk cidî vejîyayo teberê welatî. Kişta înan de ciwanî qet kêfweş nîyê û xo asayî de hîn nêkenê. Welat de pêrodayîş, betalî û feqîrî tesîrêk gird serê merdiman de viraşto.”
‘Serê bedenê cinîye de polîtîkayî yenê rayraberdiş’
Hatîmogullariye wina dewam kerd: “Tirkîya de serê cinîyan de tedayêka gird esta û hetê AKPyî ra no yeno awankerdiş. AKP Huda Par û Yenîden Refahî zî da kişta xo û teda do hîna giran bikerê. Bi awankerdişê tedaya serê komelî reyde serê cinîyê ke cuya sekuler pawenê de teda awan kenê. Wexto ke komare ame awankerdiş bi zorî sereyê cinîyan ameybî akerdiş û niha zî vanê ke wa sereyê cinîyan bêro girewtiş. Seregirewtişê cinîyan kerdî sîmgeyê sîyasî. AKP, tîfaqê Cumhurî nê çîyî pîya kenê. Serê bedenê cinîye de polîtîka yenê rayraberdiş.”
‘Cinî û keyeyî pîya zeliqnaye vînenê’
Hatîmogullariye dîyar kerd ke meclîs de pozîasyonêk ke wayîrê mezgê camêrdî yo û qiseykerdişê xo wina dewam kerd: “Pêro hetê nîjadperest û dişminê cuya sekuler ê salonê meclîsî pirr kerdê. Parlamento eynika komelî yo. Ma têkoşînê xo de zehmetîyan biancê, tevgerê cinîyan do zehmetîyê pîlî biancê. Kar û barê pîlî bikewê serê mile ma. Hûmara parlamenterê cinîyan parlamentoyî de kêmî ya. Ma partîya Çep a Keske de 61 parlamenteran de 28 hebî cinî yê. Hema hema ma resayê temsîlkarîyê têduşt. La partîyê bînî wina nîyê. Kabîneyê hukmatî de cinîyêke esta. A zî ê keyeyî ya. Cinî û keye sey pîya zeliqnaye vînenê. Seke cinî nêeşkenê wezaretê karê teberî ra biewnê, vînenê. No bi destê AKPyî yeno kerdiş. Nameyê cinî nê sîstemî de çin o. Destkewtişê cinîyan kenê hedef. La ma do destûr nêdê înan ke destkewtişê cinîyan werte ra wedarnê.”
‘Wezîfeyêk pîl keweno serê milê cinîyan’
Hatîmogullariye da zanayîş ke sey tevgerê cinîyan tena Parlamento de nê, her cayê Tirkîya de wezîfeyêk pîl keweno serê milê cinîyan û cinî do wareyan de bê û wina vat: “Demê neweyî de ma kuçe û taxan de rêxistinbîyayîş bikerê. Ma do wayîrê destkewtişê xo vejîyê. Yê ke kuçeyan de tewr zêde vurnayîş ardî ziwan cinî bî. Bi mîlyonan cinî xebate kerdî. Demê tifaqê Cumhurî de demêko rehet ma nêpaweno. Wa cinî wina bizanê.” ANQARA
