Hemvervatoxa HDKyî Esengul Demîre cewab da persanê ANFyî û prosesê weçînayîşan û netîceyê weçînayîşî ercnayî.
Esengule Demîr ard ziwan ke HDK û HDP heman torra rêxistinîye ra yê la hetê şiklê rêxistinbîyayîşî ra cîya yê. Esengule Demîr da zanayene ke Kongreya Şaran a Demokratîke (HDK) ronîyayîşê xo ra heta 2015î bi hawayêkê xurtî xebatî kerdî û HDPyî reyde rêxistinîya xo pîlêr kerde. Esengul Demîre vat: ”2015î ra dima teda û hêrişê îqtîdarî zêdîyayî. Coka têkilîya ma ya bi warê komelkî zî qels bîya. 2015 ra dima hîna zaf sîyaseto ke merkezê ci parlamento yo ame kerdene. Ganî ma naye ser o rexneyanê xo bikerê. Yew rêxistinîya ke mîyanê şarî ra nêna pîl nêbena. Ma raştîya nê çî weçînayîşan de dîye. Coka ma qebul kenê ke teng bîyê.
Ma nînan ser o xora nîqaşan kenê. Partîye zî mîyanê xo de nîqaşan kena. Ma do şarê xo reyde zî nîqaşan bikerê. Ma do goreyê nîqaş û rexneyanê şarê xo zî prosesê verê ma dîyar bikerê. Mîyanê partîya sîyasîye de kesê vervatox, temsîlkar û kadroyî ganî hesab bidê şarî. Çîyêk est o ke zaf yeno nîqaşkerdene; îstîfakerdişê beşanê selahîyetdaran ê HDP û Partîya Çep a Keske. La no metodê sîstemanê demokratîkan ê nujuva yê. Merdimê ke îstîfa kenê mesuldarîyêke nêgênê xo ser û xo danê kişte. Tradîsyonê ma de hesabdayîş-rexnedayîş û erkan vurnayîş est o. Mi çimî de metodo tewr raşt no yo.”
Demîre da zanayene ke ê armanc kenê ke abigêrê kodanê xo yê awanbîyayîşî, reyna nînan referans bigêrê û dewrê neweyî de bi nê hawayî xo rêxistin bikerê. Demîre vat: ”Şarî partîya ma ya sîyasîye û kongreya ma hişyar kerdî. Bi tradîsyonê ma, bi têkoşînê ma dîyar o ke ganî merdimî qelsbîyayîşê têkilîya nikayêne werte ra wedarnê. Seba ney zî ganî ma xo mîyanê şarî de bi raştî rêxistin bikerê.”
