Meclîsê Cinîyan ê Partîya Demokratîke ya Şaran (HDP) ra Zeynep Nîlgun Salmanere derheqê polîtîkayanê serê cinîyan de ANFyî rê qisey kerd.
Salmanere ard ziwan ke popularîzmo raştgîro ke dinya de serdestîya camêrdan paweno, bi pêro îmkananê xo vera cînsê komelî şer keno. Salmanere vat: ”Ewro Îtalya de şîarê ‘Homa, welat, keye’ yê Musoliniyî cewabî vîneno, Swêd de koalîsyono muhefezakar sîyasetê femînîstî asteng keno, welatanê sey Tirkîya, Macarîstan û Polonya de rejîmê totalîterî aver şinê, heqê kurtajî yeno astengkerdene. Nê pêro tesadufî nîyê. Weçînayîşanê menga gulane yê Tirkîya de ma pêroyînan tecrube kerd ke heqê cinîyan senî ameyê rotene. Qiseyê hişmendîya hempare yê sey ‘ma do cinîyan weye bikerê’ û ‘ayetê 6284î’ nê prosesan ra cîya nîyê.”
Salmanere da zanayene ke îtîfaqo ke hetê AKPyî ra ronîyayo do vera têkoşînê cinîyan polîtîkayanê xo yê şîdetî xorinêr bikero.
Salmanere îfade kerd ke ê sey cinîyanê HDP û Partîya Çep a Keske seba azadîye û têdûştîye prosesêkê neweraawankerdişî de yê û vat: ”Ez wazena bale bianca ney ser ke ma do heqanê xo ra fek vera nêdê ke ma seba nînan bedelê giranî dabî. Ma zanenê ke polîtîkayê şerî-şîdetî û hêrişê vera cinîyan senî yenê caardene. Coka rayîrê awankerdişê cuya newî ya azade û pawitişê haştîye yê vera îtîfaqanê kolonyalîst têkoşîno hempar o. Xoverdayîşo ke ma zere û teber de kerdo yew, heta azadîya cinîyan û şaran bêra caardene do dewam bikero.” ANQARA
