Bajarê Strasbourgî ya Fransa de hetê Yewîya Avûkatan a Ewropa ya Semedê Parlamentoyê Ewropa de Demokrasî û Heqê Merdiman (ELDH) û Komeleya Demokrasî û Huqûqî yê Mîyanneteweyî (MAF-DAD) konferansêk ame kerdene. Konferanso ke bi sernameyê Tirkîya de Heq û azadîyîyê: Huqûq, Zîndanî û meseleya kurdan ame organîzekerdene bi hetkarîya Partîya Çepe, Îtîfaqê Averberdoxî yê Sosyalîstan û Demokratan (S&D) ame kerdene.
Konferans de Katalonya ra Prof. Louis Lemkowî ard ziwan ke Tirkîya de zî sey Îspanya dezgehê edaletî sey hacetî şuxilîyeno û sîyaset tesîrê ci keno.
Prof. Philip Leachî bale ante ser ke Tirkîya biranê Mehkemeya Heqanê Merdiman a Ewropa (MHME) nêana ca û vat: ”Konseya Ewropa waştbi ke Selahattîn Demîrtaş û Osman Kavala wa cade bêrê veradayene. Dewaya Demîrtaşî bi zelalî mojnena ke Tirkîya de sîyaset senî tesîrê mehkemeyan keno.”
Roniştişê verênî yê konferansî bi qiseykerdişê Wekîlê PE Fabiio Massimo Castaldoyî qedîya. Castaldoyî dîyar kerd ke Parlamentoyê Ewropa (PE) seba ke biranê MHME bîyara ca Tirkîya rê teda bikero.
Roniştişê diyînî yê konferansî de hêverî Serekê Baroyê Amedî Nahît Erenî qisey kerd. Erenî pare kerd ke Tirkîya de huqûq goreyê şexsan yeno caardene.
Buroyê Huqûqî yê Asrinî ra Avûkat Cengîz Yureklîyî derheqê tecrîdê Îmraliyî de konferans de tay agahîyî dayî. Yureklîyî vat: ”Komîteya Vergirewtişê Îşkenceyî (CPT) vana ke heta ke destûrê Tirkîya çin bo ê nêeşkenê raporê xo yê serê Îmraliyî eşkera bikerê. No hetê huqûqî ra raşt o la ganî CPT bieşko vajo ke Îmrali de heqî yenê binpaykerdene.”
Avûkate û Endama Delegasyonê Zîndanan ê Tirkîya Miriame Fieding derheqê pêvînayîşanê xo yê bi keyeyanê tepişteyan de qisey kerd û vat: ”Keyeyî nêeşkenê tepişteyan zîyaret bikerê. Îdarekerê baroyan û avûkatî seba pawitişanê xo ra teda vînenê.”
Endama Komeleya Huqûqnasan a Seba Azadîye (OHD) Rengîn Ergule pê hesna ke Tirkîya ganî ‘heqê hêvî’ bîyara ca.
Roniştişê hîrêyînî de Îrlanda ra Komeleya Avûkatanê Sosyalîstan ra Declan Owensî bi sernameyê ‘Rolê Huqûqî û Tecrubeyanê Çareserîya Pêkewtişan’ pêşkêşîyêke kerde. Endama PENa Norwêçî Caroline Stockford babeta ‘Heqê Pawitişê bi Kurdkî û Tedayanê Serê Rojnamegeranê Kurdan û Medya’ ercnaye. Îtîfaqê Averwazî yê Demokratan û Sosyalîstan ra Giuliano Pisapiayî zî derheqê demokratîkbîyayîşê Tirkîya de rolê Ewropa de qisey kerd. STRASBOURG
